قىركۇيەك ايىنىڭ قورىتىندىسى بويىنشا «Enbek.kz» ەلەكتروندىق ەڭبەك بيرجاسىندا 138،2 مىڭ بوس جۇمىس ورنى جانە 130،6 مىڭ تۇيىندەمە جاريالانعان
تامىز ايىمەن سالىستىرعاندا سۇرانىس 42،4%-عا (101،6 مىڭعا) قىسقارسا، ۇسىنىس تەك 5،7%-عا (7،9 مىڭعا) تومەندەدى. ءار ەكىنشى بوس جۇمىس ورنى جۇمىسشى ماماندارعا ارنالعان ەدى، - دەپ حابارلايدى Aqshamnews.kz.
ەڭ بەلسەندى سالانىڭ ءبىرى قايتادان ءبىلىم سالاسى بولىپ شىقتى – وندا 55 مىڭنان استام بوس جۇمىس ورنى (40%) تىركەلدى. تاعى 16،3 مىڭ بوس جۇمىس ورنى «باسقا قىزمەت تۇرلەرى» (≈12%) بويىنشا جاريالانىپ، ال 10 مىڭ بوس جۇمىس ورنى دەنساۋلىق ساقتاۋ جانە الەۋمەتتىك قىزمەت كورسەتۋ سالاسىنا (≈7%) تيەسىلى بولدى. جالپى العاندا، سۇرانىس ۇسىنىستان 7،6 مىڭعا استى.
قىركۇيەكتە كوبىنەسە ورتاشا بىلىكتى ماماندارعا (57 مىڭ بوس جۇمىس ورنى)، ودان كەيىن جوعارى بىلىكتى ماماندارعا (49 مىڭ)، ەڭ از – بىلىكتىلىگى جوق ادامدارعا (32،2 مىڭ) قاجەتتىلىك بايقالدى. ۇسىنىس جاعىنان جوعارى بىلىكتى جۇمىس ىزدەۋشىلەردىڭ تۇيىندەمەلەرى باسىم بولدى – 55،4 مىڭ، كەيىنگى ورىندا ورتاشا بىلىكتىلەر – 47،7 مىڭ جانە بىلىكتىلىگى جوق ادامدار – 27،5 مىڭ. وسىلايشا، قىركۇيەكتە جۇمىس بەرۋشىلەر كوبىنە ورتاشا بىلىكتى كادرلاردى ىزدەسە، جۇمىس ىزدەۋشىلەر اراسىندا جوعارى بىلىكتى ماماندار كوش باستادى.
ەڭ بەلسەندى جۇمىس بەرۋشىلەر استانا (11،4 مىڭ بىرلىك) مەن الماتى (10،2 مىڭ بىرلىك) قالالارىندا، سونداي-اق پاۆلودار وبلىسىندا (9،4 مىڭ بوس جۇمىس ورنى) بايقالدى. ال جۇمىس ىزدەۋشىلەر تاراپىنان ءداستۇرلى تۇردە وڭتۇستىك وڭىرلەر كوش باستادى: تۇركىستان وبلىسىندا – 15،7 مىڭ، شىمكەنت قالاسىندا – 9 مىڭ، قىزىلوردا وبلىسىندا – 8،5 مىڭ تۇيىندەمە جاريالانعان.
قىركۇيەكتە جاريالانعان بوس جۇمىس ورىندارىنىڭ ءار ەكىنشىسى (68 مىڭ بىرلىك) جۇمىسشى ماماندىقتارىنا ارنالدى، ونىڭ ىشىندە 39%-ىن (26،3 مىڭ) ناقتى ەكونوميكانىڭ كاسىپورىندارى ۇسىندى. جۇمىسشى ماماندىقتار ىشىندە نەگىزگى سۇرانىس ءوندىرىس سالاسىنداعى بىلىكتى جۇمىسشىلارعا (23،5 مىڭ بىرلىك)، كولىك جانە لوگيستيكا سالاسىنا (5،9 مىڭ) جانە ءبىلىم مەن تاربيە سالاسىنا (4،4 مىڭ) ءتۇستى. ناقتى ماماندىقتار بويىنشا ەڭ جوعارى سۇرانىس اۆتوكولىك جۇرگىزۋشىلەرىنە (2 مىڭ بوس جۇمىس ورنى)، تاربيەشى كومەكشىلەرىنە (1،8 مىڭ) جانە سانيتار ماماندارىنا (1،7 مىڭ) بولدى.
جاس ەرەكشەلىگىنە كەلسەك، ءار ەكىنشى تۇيىندەمە 34 جاسقا دەيىنگى ۇمىتكەرلەر تاراپىنان ورنالاستىرىلعان – 63،8 مىڭ بىرلىك. بۇل توپتىڭ ىشىندە ەڭ بەلسەندىلەرى – 16-24 جاس ارالىعىنداعى جاستار (28 مىڭ تۇيىندەمە). ءار ءتورتىنشى تۇيىندەمە ورتا جاستاعى (35-44 جاس) ازاماتتارعا تيەسىلى – 33 مىڭ بىرلىك. تاعى 17% (22،5 مىڭ) – 45-54 جاس ارالىعىنداعى ۇمىتكەرلەرگە، ال زەينەتالدى جاستاعىلاردىڭ ۇلەسى بارلىق تۇيىندەمەلەردىڭ 9%-ىن (11،3 مىڭ) قۇرادى. جىنىستىق قۇرام بويىنشا ايەلدەر بەلسەندىرەك بولدى – ەەب-دە ورنالاستىرىلعان تۇيىندەمەلەردىڭ 59%-ى تيەسىلى. ونىڭ ىشىندە ءار ەكىنشى تۇيىندەمە جوعارى بىلىكتى ەڭبەككە ارنالعان بوس جۇمىس ورىندارىنا باعىتتالعان.
قىركۇيەك ايىندا جۇمىس بەرۋشىلەر ۇسىنعان ەڭ جوعارى جالاقى كولەمى باس قۇرىلىسشى قىزمەتىندە بايقالدى (~705 مىڭ تەڭگە)، ودان كەيىن شاحتا وقپاندارىن بۇرعىلاۋ قوندىرعىسىنىڭ ءماشينيسى (~700 مىڭ تەڭگە) جانە ءوندىرۋشى ونەركاسىپتەگى ۋچاسكە باستىعىنىڭ ورىنباسارى (~681 مىڭ تەڭگە) قىزمەتتەرىندە تىركەلدى. ال ۇمىتكەرلەردىڭ ەڭ جوعارى جالاقىعا دەگەن ءۇمىتى كوممەرسيالىق اۋە لاينەرىنىڭ ۇشقىشى (~2،8 ملن تەڭگە)، IT-سەكتورداعى تەحنيكالىق ديرەكتور (1،4 ملن تەڭگە) جانە قۇرىلىس سالاسىنداعى ءبولىم باسشىسى (~1،2 ملن تەڭگە) لاۋازىمدارى بويىنشا بولدى.
وسىلايشا، قىركۇيەكتە ماۋسىمدىق سۇرانىس فاكتورلارى ساقتالدى: ءبىلىم بەرۋ مەن تاربيە سالاسىنداعى بوس جۇمىس ورىندارى ءالى دە الدىڭعى قاتاردا تۇر. وڭىرلەردەگى دەموگرافيالىق ايىرماشىلىقتار سۇرانىس پەن ۇسىنىس اراسىنداعى تەڭگەرىمدى ايقىنداۋدى جالعاستىرىپ، مەگاپوليستەر مەن ونەركاسىبى دامىعان وبلىستاردا جوعارى بەلسەندىلىكتى قولداپ وتىر. بوس جۇمىس ورىندارىنىڭ جارتىسى جۇمىسشى ماماندىقتارىنا تيەسىلى بولدى، بۇل ولاردىڭ ەڭبەك نارىعىنداعى قۇرىلىمدىق ماڭىزىن ايقىن كورسەتەدى.