ق ر ەڭبەك جانە حالىقتى الەۋمەتتىك قورعاۋ مينيسترلىگى ۇزدىك ەڭبەك اۋلەتتەرى مەن ءوندىرىس جۇمىسكەرلەرىن انىقتاۋعا باعىتتالعان «ەڭبەك جولى» رەسپۋبليكالىق كونكۋرسىنىڭ وڭىرلىك كەزەڭىنە قاتىسۋ ءۇشىن وتىنىمدەردى قابىلداۋ باستالعانىن حابارلايدى.
بۇعان دەيىن حابارلانعانداي، مەملەكەت باسشىسى 2024 جىلعى 2 قىركۇيەكتەگى قازاقستان حالقىنا جولداۋىندا 2025 جىلدى – جۇمىسشى ماماندىقتار جىلى دەپ جاريالادى.
«ەڭبەك جولى» بايقاۋى ەلىمىزدەگى ەڭبەك كۇنىن مەرەكەلەۋگە جانە «ەڭبەك ادامىن» قۇرمەتتەۋگە ورايلاستىرىلعان. ول ءونىمدى ەڭبەكتى ىنتالاندىرۋعا، جاستار اراسىندا جۇمىسشى ماماندىقتارىن ناسيحاتتاۋعا جانە جۇمىسشى اۋلەتتەردىڭ كوپجىلدىق داستۇرلەرىن نىعايتۋعا باعىتتالعان، دەپ حابارلايدى aqshamnews.kz.
كونكۋرس جىل سايىن ەكى كەزەڭدە – وڭىرلىك جانە رەسپۋبليكالىق دەڭگەيدە، ءۇش نوميناسيا بويىنشا وتكىزىلەدى: «ۇزدىك ەڭبەك اۋلەتى» – ەڭ ۇزاق ەڭبەك ءوتىلى بار، ەڭ كوپ ماراپاتتارعا يە ەڭ ۇلكەن اۋلەت تاڭدالادى؛ «ءوندىرىستىڭ ۇزدىك جاس جۇمىسكەرى» – 5 جىلدان اسپايتىن جۇمىس ءوتىلى بار ءوندىرىستىڭ ەڭ بەلسەندى جانە ەڭبەكقور جۇمىسكەرى تاڭدالادى؛ «جۇمىس ىستەيتىن جاستاردىڭ ۇزدىك تالىمگەرى» – كەمىندە 20 جىل جۇمىس ءوتىلى بار ەڭ بەلسەندى جانە ءتيىمدى تالىمگەر تاڭدالادى.
كونكۋرسقا ونەركاسىپ سالاسىنا قاراماستان بارلىق كاسىپورىنداردىڭ جۇمىسكەرلەرى قاتىسا الادى.
كونكۋرستىڭ وڭىرلىك كەزەڭىنىڭ جەڭىمپازدارىن وبلىستار مەن رەسپۋبليكالىق ماڭىزى بار قالالار اكىمدەرى ورىنباسارلارىنىڭ توراعالىعىمەن كوميسسيالار ايقىندايدى. كونكۋرستىڭ رەسپۋبليكالىق كەزەڭىنىڭ جەڭىمپازدارىن قۇرامىنا ق ر پارلامەنتىنىڭ دەپۋتاتتارى، رەسپۋبليكالىق كاسىپوداقتار بىرلەستىكتەرىنىڭ جانە جۇمىس بەرۋشىلەردىڭ وكىلدەرى كىرەتىن ەڭبەك جانە حالىقتى الەۋمەتتىك قورعاۋ مينيسترلىگى جانىنداعى كوميسسيا ايقىندايدى.
ەڭبەكمينى ەڭبەك اۋلەتتەرىنىڭ وكىلدەرىن دە، باستاماشىل جاس جۇمىسكەرلەر مەن ولاردىڭ تالىمگەرلەرىن دە كونكۋرسقا بەلسەندى قاتىسۋعا شاقىرادى.
وسى سايىس جونىندە تولىعىراق اقپارات الۋ ءۇشىن وبلىستار مەن استانا، الماتى جانە شىمكەنت قالالارى اكىمدىكتەرىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا حابارلاسۋىڭىز كەرەك.