قازاقستاندا 200 مىڭعا جۋىق ەستۋ قابىلەتى تومەن ازامات بار، ولاردىڭ جارتىسىنان استامى ەڭبەككە جارامدى. دەگەنمەن، جۇمىسقا ورنالاسۋ ماسەلەسى كۇردەلى. جۇمىس بەرۋشىلەردىڭ ايتۋىنشا، مۇنداي ادامداردىڭ كوپشىلىگى قاجەتتى بىلىكتىلىككە يە ەمەس. بۇل ەڭبەككە جارامدى جانداردىڭ مۇمكىندىكتەرىن شەكتەپ قانا قويماي، ولاردىڭ ءومىر ءسۇرۋ ساپاسىنا دا ايتارلىقتاي اسەر ەتەدى.
مانيكيۋر جاساۋشى ەلميرا امانجولوۆا وسى ماسەلەلەردىڭ بارلىعىن ءوز ومىرىندە سەزىنگەن. ءۇش جاسىندا تۇماۋدان كەيىنگى اسقىنۋدىڭ سالدارىنان ەستۋ قابىلەتىنەن ايىرىلعان ول مەكتەپتى اياقتاعان سوڭ مانيكيۋر جانە ماكياج كۋرستارىن وقىعان. قازىرگى تاڭدا كليەنتتەرىن ءوز ۇيىندە قابىلداپ، قىزمەت كورسەتۋدە. الايدا، سۇلۋلىق سالونىنا جۇمىسقا ورنالاسۋ مۇمكىندىگى جوق ەكەنىن ايتادى، سەبەبى ەستۋ قابىلەتىنىڭ شەكتەۋلىگى قارىم-قاتىناس جاساۋدا قيىندىق تۋدىرادى.
- ءبىر كۇندە بىرنەشە كليەنت قابىلدايمىن. مانيكيۋردەن بولەك، ماكياج جاساي الامىن. ءوزىمنىڭ سۇلۋلىق سالونىمدى اشۋدى ارماندايمىن، شاعىن عيماراتتى جالعا العىم كەلەدى. ءبىراق ەستۋ قابىلەتى تومەن ادامدارعا ارنالعان بيزنەسكە قولداۋ باعدارلامالارى جوق. ءقازىر ايىنا شامامەن 200 مىڭ تەڭگە تابامىن. بۇل اقشا تەك ازىق-تۇلىك پەن پاتەراقىعا جەتەدى. ءوز پاتەرىمدى الۋ مۇمكىن ەمەس. ءۇش بالانىڭ اناسى بولعاندىقتان، قوسىمشا كومەككە ءزارۋمىن، ءبىراق ءۇشىنشى توپتاعى مۇگەدەكتەرگە جەڭىلدىك باعدارلامالارى قاراستىرىلماعان، - دەيدى ەلميرا امانجولوۆا
ەلميرانىڭ وقيعاسى قازاقستانداعى مۇمكىندىگى شەكتەۋلى جانداردىڭ باستى ماسەلەلەرىن ايقىن كورسەتەدى. قازىرگى تاڭدا مۇنداي ادامدارعا جۇمىسقا ورنالاسۋ، كاسىپكەرلىكپەن اينالىسۋ، ءوز قابىلەتتەرىن دامىتۋعا مۇمكىندىك الۋ وڭاي ەمەس. ەستۋ قابىلەتى تومەن ازاماتتار ءۇشىن ارنايى باعدارلامالاردىڭ جوقتىعى، جۇمىس بەرۋشىلەردىڭ شەكتەۋلى تۇسىنىگى جانە قوعامداعى قولداۋ دەڭگەيىنىڭ تومەندىگى ولاردى ۇلكەن قيىندىقتارعا اكەلەدى.
سونىمەن قاتار، قازاقستاندا بۇل ماسەلەلەردى شەشۋدىڭ الەۋەتى زور. ەڭبەك ەتەمىن دەگەن جاندار ءۇشىن ارنايى كۋرستار، جەڭىلدەتىلگەن نەسيە، كاسىبي باعدار بەرۋ جانە جۇمىس ورىندارىن اشۋ باعدارلامالارى ىسكە اسسا، ولاردىڭ دا قوعامعا قوسار ۇلەسى ارتا تۇسەر ەدى. ءاربىر ازاماتتىڭ ەڭبەك ەتۋ قۇقىعى بار، ال قوعامنىڭ مىندەتى – سول مۇمكىندىككە جول اشۋ. ەڭبەككە دەگەن تالپىنىستى قولداۋ – مەملەكەت دامۋىنىڭ ماڭىزدى كورسەتكىشى.