جىلدا ءبىر كەلەتىن ەڭبەك دەمالىسى ءبىتىپ، جۇمىس ورنىنا ورالعان ساتتە كوپشىلىگى بىردەن ىسكە كىرىسىپ كەتە الماي جۇرەدى.
مۇنداي جايتتار كوپشىلىككە جاقسى تانىس.وسى جاعدايدان شىعۋ ءۇشىن نە ىستەۋ كەرەك؟
بۇل تۋرالى Almaty-akshamy.kz Elorda.info سايتىنىڭ جۇرگىزگەن زەرتتەۋىن ۇسىنادى.
گەشتالت-تەراپيەۆت ەلميرا شانييەۆانىڭ ايتۋىنشا، ەڭبەك دەمالىسىنان ورالعاندارعا قانداي دا ءبىر كەڭەس بەرمەس بۇرىن، ول ادامنىڭ قانشا ۋاقىت، قاشان، قايدا، قالاي جانە قانداي جاعدايدا تىنىققانى جايلى مالىمەتتەرگە ءمان بەرۋ كەرەك. بىرەۋ 3 كۇن، بىرەۋ 1 اپتا، ال بىرەۋ 30 كۇن دەمالۋى مۇمكىن. الدەكىم ۇيىندە، الدەكىم شەتەلدە ەڭبەك دەمالىسىن وتكىزگەن بولار. دەمالىستا ادام تولىققاندى ءوز رەسۋرسىن قالپىنا كەلتىرە الدى ما؟ بىرەۋلەر بۇل ۋاقىتتا سىرقاتتانىپ قالعان شىعار، مۇمكىن ساياحاتقا بالا-شاعاسىمەن بارىپ شارشاپ كەتتى مە؟ الدە ادامدى قۇر دەمالىس جالىقتىردى ما نەمەسە ءۇي ىشىندەگى ايقاۋ-شۋ قاجىتتى ما؟ مۇنىڭ بارلىعى – جەكەلەگەن وزگەشەلىكتەر، سايكەسىنشە كەڭەستەر دە ءارتۇرلى بولماق.
«مەنىڭشە، ەڭ باستى نازار اۋدارۋ كەرەك نارسە: كليمات اۋىستىرساڭىز، ورتا وزگەرسە، ول جاقتان كەلگەن سوڭ، مىندەتتى تۇردە، بەيىمدەلۋگە ۋاقىت كەرەك. مىسالى، مەن كەشە عانا تۇركيادان كەلدىم. ماعان ادەتتەگى جۇمىس اعىنىنا ىلەسىپ كەتۋ ءۇشىن ۋاقىت كەرەك. ءسىز دە وزىڭىزدەن سۇراڭىز: «ماعان دەمالىس كەرەك پە، الدە جۇمىسقا شىعۋىم كەرەك پە؟» دەپ. ەگەر شارشاپ-شالدىعىپ، وز-وزىڭىزگە كەلە الماي تۇرساڭىز، مۇمكىندىگىڭىز بولسا، 1-2 كۇن تىنىعىپ الىڭىز. ونداي مۇمكىندىك بولماسا، ءسال-پال كوڭىلىڭىز قۇلازىپ، اشۋلانىپ العان سوڭ، ۇلكەندەرشە شەشىم قابىلداڭىز. ويتكەنى ۇلكەن ادام الدىندا تۇرعان مىندەتتى، ونى ورىنداماسا نە بولاتىنىن تۇسىنەدى عوي»، - دەدى گەشتالت-تەراپيەۆت ەلميرا شانييەۆا.
ال پەداگوگ-پسيحولوگ شىنار توكەنوۆانىڭ ايتۋىنشا، كەيبىر پسيحولوگيالىق ادىستەر ادامنىڭ ويىن جاقسى ارناعا بۇرىپ، دەمالىستان كەيىنگى كۇيزەلىستى ازايتىپ، قىزمەت اعىنىنا ىلەسىپ كەتۋىنە كومەكتەسەتىنىن ايتتى. ول ءۇشىن ەڭبەك دەمالىسىنان جۇمىسقا ورالعان قىزمەتكەر مىنا كەڭەستەردى ورىنداسا بولادى:
1. جۇمىس ۇستەلىنە نەمەسە كابينەتىنە وزگەرىستەر جاساۋ
2. ءوزى ۇناتىپ، تاڭداپ العان جاڭا كيىم كيۋ
3. ءوزىنىڭ مىقتى تۇستارىن جازۋ
4. كوبىرەك ورتامەن ارالاسۋ
5. تاپسىرمالاردى وڭاي-كۇردەلىلىگىنە قاراي ءبولىپ شىعۋ.