جاز - ەڭبەك دەمالىسىنىڭ كەزەڭى. قىزمەتكەر ەگەر زاڭدى ەڭبەك دەمالىسىنا شىققاندا باستىعى جۇمىس بويىنشا حابارلاسسا، جاۋاپ بەرمەۋىنە بولا ما؟ باستىعى ونى مازالاعان جاعدايدا نە بولادى؟ جۇمىسشىعا نە ىستەمەك كەرەك؟ اqshamnews.kz ءتىلشىسى زاڭگەردەن سۇراپ ءبىلدى.
ەڭبەك دەمالىسىنىڭ ەڭ از ۋاقىتى قانشا؟
قازاقستان رەسپۋبليكاسىنىڭ ەڭبەك كودەكسىنە سايكەس، ءاربىر قىزمەتكەر جىل سايىنعى اقى تولەنەتىن ەڭبەك دەمالىسىنا قۇقىلى. بۇل – جۇمىسشىنىڭ زاڭمەن قورعالاتىن قۇقىعى. ونىڭ ماقساتى – قىزمەتكەردىڭ دەنساۋلىعىن قالپىنا كەلتىرۋ، كۇش-قۋاتىن تولىقتىرۋ جانە جەكە ىستەرىنە ۋاقىت ءبولۋ.
ەڭبەك دەمالىسىنىڭ ەڭ از ۇزاقتىعى – جىلىنا 24 كۇنتىزبەلىك كۇن. ال كەيبىر سالا قىزمەتكەرلەرى ءۇشىن (مۇعالىمدەر، زياندى ورتادا ىستەيتىندەر) بۇل مەرزىم ۇزاعىراق بولۋى مۇمكىن.
بۇل كەزەڭدە قىزمەتكەر ەڭبەك مىندەتتەرىنەن بوساتىلادى جانە جۇمىس بەرۋشى تاراپىنان ەڭبەكاقى ساقتالادى. دەمالىس ۋاقىتىندا ەشقانداي جۇمىسقا تارتۋعا جول بەرىلمەيدى، تەك قىزمەتكەردىڭ ءوز ەركىمەن كەلىسىمى بولعان جاعدايدا عانا قوسىمشا تاپسىرمالار ورىندالۋى مۇمكىن.
ەڭبەك دەمالىسى كەزىندە جۇمىستان مازالاسا نە ىستەۋ كەرەك؟
زاڭگەر قۋات اۋعانبەكتىڭ ايتۋىنشا، ەڭبەك زاڭناماسىندا دەمالىستاعى قىزمەتكەرگە قوڭىراۋ شالۋعا نەمەسە جازۋعا تىكەلەي تىيىم سالىنباعان. دەگەنمەن بۇل قادام ۇسىنىلمايدى.
"قىزمەتكەردىڭ جىل سايىنعى اقى تولەنەتىن ەڭبەك دەمالىسى – ونىڭ زاڭدى قۇقىعى. بۇل كەزەڭدە ول جۇمىس مىندەتتەرىن اتقارماۋعا ءتيىس. سوندىقتان باسشىلىق تاراپىنان ءجيى حابارلاسۋ دۇرىس ەمەس. تەك توتەنشە جاعداي تۋىنداسا نەمەسە اسا ماڭىزدى ماسەلە بويىنشا شۇعىل بايلانىس قاجەت بولسا عانا ورىندى دەۋگە بولادى. ال ەگەر قىزمەتكەردىڭ ءوزى كەلىسىپ، حابارلامالارعا جاۋاپ بەرسە، زاڭبۇزۋشىلىق بولمايدى"، – دەيدى قۋات اۋعانبەك.
نەنى ەسكەرگەن ءجون؟
-
الدىن الا ەسكەرتۋ: دەمالىسقا شىعار الدىندا باسشىلىققا جانە ارىپتەستەرگە دەمالىس كۇندەرىن ناقتى كورسەتىپ حابارلاڭىز.
-
اۆتوجاۋاپ قوسىپ قويىڭىز: ەلەكترون پوشتاعا نەمەسە مەسسەندجەرگە "ءقازىر دەمالىستامىن" دەگەن قىسقاشا حابارلاما ورناتىپ قويىڭىز.
-
ىستەردى تاپسىرىپ كەتىڭىز: جۇمىستاعى اعىمداعى مىندەتتەردى ارىپتەستەرگە ءبولىپ بەرىڭىز، بۇل سىزگە دەمالىستا تىنىش بولۋعا كومەكتەسەدى.