كوڭدى كادەگە جاراتتى.
اباي وبلىسىنىڭ اقسۋات اۋدانى ەكپىن اۋىلىنىڭ تۇرعىنى ماقسات كۇشەبايەۆ وتىننىڭ جاڭا ءتۇرىن ويلاپ تاپتى، دەپ حابارلايدى Almaty-akshamy.kz Massaget.kz-كە سىلتەمە جاساپ.
ءيا، راسىندا تاڭعالارلىق. تاڭعالارلىعى سول، ونەرتاپقىش ازامات ءشوپتىڭ ساعدارى مەن مالدىڭ استىنان شىعاتىن كوڭنەن كومىر دايىنداعان. ول ءۇشىن ءوز قولىمەن ستانوك قۇراستىرىپتى.
«مالدىڭ استىنان شىققان كوڭ مەن ءشوپتىڭ ساعدارلارىن جۇرت ورتەپ جاتىر. بوسقا ورتەگەنشە نەگە وتىن رەتىندە پايدالانباسقا" دەگەن وي كەلدى. ءسويتىپ، ارنايى ستانوكتىڭ كومەگىمەن كوڭ مەن ءشوپ قالدىقتارىن سىعىپ، بىرنەشە بولىككە ءبولىپ، كومىر جاساپ جاتىرمىن. جىلۋى دا، قىزۋى دا كۇشتى. مۇنداي قۇرىلعى ءار اۋىلدا بولسا دەپ ويلايمىن. ءبىر جاعىنان، تۇرعىندارعا جۇمىس، ەكىنشى جاعىنان، كوپ-كورىم كومەك بولار ەدى»، - دەيدى ونەرتاپقىش.
ماقسات كۇشەبايەۆ بۇرىن متم-دا (ماشينا-تراكتور ستانساسى) ۇستا بولىپ جۇمىس ىستەگەن ەكەن. ءقازىر جەكە كاسىپكەر. ەلىمىز تاۋەلسىزدىگىن العان ەلەڭ-الاڭ شاقتا اۋىلدا تەحنيكا قالماعاندا ءوز قولىمەن ءشوپ تاسيتىن كولىك پەن تەمىر تور توقيتىن ستانوك جاساپتى. ال جاقىندا ازىرلەگەن كوڭ مەن ساعداردان كومىر شىعاراتىن قۇرىلعى مەن وتىننىڭ جاسالۋ تەحنولوگياسى تۋرالى تولىق اشىپ ايتپادى.
«ماقتانىپ ايتۋعا ءالى ەرتە. ءقازىر بۇل قۇرىلعى جارتىلاي جۇمىس ىستەپ تۇر. اكىمشىلىك قولداۋ بىلدىرەمىز دەپ وتىر. سول كەزدە قۇرال-سايمانداردى الىپ، ستانوكتى تولىق ىسكە قوسامىن»، - دەيدى ماقسات كۇشەبايەۆ.