الماتىدا رەسپۋبليكالىق «قارۋ» جەدەل الدىن الۋ ءىس-شاراسى وتۋدە.
ول ءتيىستى قوعامدىق ءتارتىپتى ساقتاۋ، اتىس قارۋىن قولدانۋمەن جاسالعان قىلمىستاردىڭ الدىن الۋ جانە جولىن كەسۋ ماقساتىندا وتكىزىلۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ازاماتتىق جانە قىزمەتتىك قارۋ اينالىمىنا ءتيىمدى مەملەكەتتىك باقىلاۋدى قامتاماسىز ەتۋ بويىنشا شارالار قابىلداندى. زاڭسىز ساقتالعان قارۋدى انىقتاۋ ءۇشىن 38 توپ قۇرىلدى. جەدەل الدىن الۋ ءىس-شاراسىن وتكىزۋ كەزەڭىندە بارلىعى 147 ازاماتتىق جانە قىزمەتتىك قارۋدى ساقتاۋ، ەسەپكە الۋ جانە قايتا تىركەۋ شارتتارىن بۇزۋ دەرەكتەرى انىقتالىپ، ناتيجەسىندە 145 جەكە مەنشىك يەسى جانە 2 زاڭدى تۇلعا ق ر اقبتك-نىڭ 484-بابى (ازاماتتىق جانە قىزمەتتىك قارۋ اينالىمى قاعيدالارىن بۇزۋ) جانە ق ر اقبتك-نىڭ 486-بابى (ازاماتتىق، قىزمەتتiك، ماراپاتتىق، كوللەكسيالىق قارۋدى تiركەۋ (قايتا تiركەۋ) نە ونى ەسەپكە قويۋ ءتارتىبىن بۇزۋ) بويىنشا اكىمشىلىك جاۋاپكەرشىلىككە تارتىلدى. انىقتالعان زاڭ بۇزۋشىلىقتار جويىلعانعا دەيىن 89 بىرلىك تىركەلگەن قارۋ تاركىلەندى. ودان بولەك، زاڭسىز اينالىمنان 8 بىرلىك تىركەلمەگەن قارۋ، 1 بىرلىك جارىلعىش زات، 549 مىلتىقتىڭ پاترونى، 6 تەگىس ۇڭعىلى قارۋدىڭ پاترونى، 10 تراۆماتيكالىق قارۋدىڭ پاترونى، 5 دانا سۋىق قارۋ، 2 جارىقتى-شۋلى گراناتا تاركىلەندى. ق ر قك-نىڭ 287-بابىنا (قارۋدى، ءوق-دارiلەردi، جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكiزۋ، ساقتاۋ، تاسىمالداۋ نەمەسە الىپ ءجۇرۋ) سايكەس تىركەلمەگەن تەگىس ۇڭعىلى، گاز-تراۆماتيكالىق جانە گازدى قارۋدى زاڭسىز ساقتاۋ بويىنشا بارلىعى 11 قىلمىستىق ءىس تىركەلدى»، – دەپ حابارلادى الماتى قالالىق پد اكىمشىلىك پوليسيا باسقارماسىنىڭ باستىعى اسحات قۇلبايەۆ.
سونداي-اق پد-دا تەكسەرىسپەن پنيەۆماتيكالىق قارۋلار مەن ەلەكتروشوكەرلەردى ساتاتىن جەرلەر قامتىلعانىن، زاڭعا سايكەس، قارۋدى ساتۋ قۇقىعىنا ليسەنزياسى بار زاڭدى تۇلعالار ساتۋى ءتيىس ەكەنىن اتاپ ءوتتى.
«قالاداعى بازارلارداعى ساۋدا ورىندارىن تەكسەردىك. “ياليان” بازارىندا پنيەۆماتيكالىق مىلتىق پەن ەلەكتروشوكەرلەردى ساتاتىن جەكە كاسىپكەرلەر انىقتالدى. ولار تاركىلەنىپ، ساراپتاماعا جىبەرىلدى، ناتيجەسىندە شارالار قابىلدانىپ، قۇقىقتىق باعا بەرىلەتىن بولادى»، – دەدى الماتى قالالىق پد ءاپب ازاماتتىق جانە قىزمەتتىك قارۋ اينالىمىن باقىلاۋ ءبولىمىنىڭ باسشىسى راحيم تولوكۋلوۆ.