ورتاشا جالاقى مەن ەڭبەك ونىمدىلىگىنە قاراي بەلگىلەنەدى.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، ەڭ تومەنگى جالاقىنى (ەتج) جاڭا ادىسپەن ەسەپتەۋ جوسپارلانىپ وتىر، دەپ حابارلايدى Almaty-akshamy.kz
"ەڭ تومەنگى جالاقىنى انىقتاۋدىڭ جاڭا ادىستەمەسىن ازىرلەۋ بويىنشا جۇمىستار اياقتالىپ جاتىر. قازىرگى ۋاقىتتا مينيسترلىك دۇنيەجۇزىلىك بانك ساراپشىلارىمەن بىرلەسىپ، ەڭ تومەنگى جالاقى مولشەرىن انىقتاۋ ادىستەمەسى جوباسىن دايىندادى"، - دەدى دۇيسەنوۆا.
ونىڭ ايتۋىنشا، ەڭ تومەنگى جالاقى مولشەرى ورتاشا جالاقى مەن ەڭبەك ونىمدىلىگىنە قاراي بەلگىلەنەدى.
"بۇل ءتاسىل قىزمەتكەرلەردىڭ كىرىسى مەن وندىرىلگەن تاۋارلار، جۇمىستار مەن قىزمەتتەر كولەمى اراسىنداعى ناقتى بايلانىستى ورناتۋعا مۇمكىندىك بەرەدى. بۇگىندە ادىستەمە جوباسى مۇددەلى مەملەكەتتىك ورگاندار جانە الەۋمەتتىك سەرىكتەستەرمەن كەلىسىلىپ جاتىر"، - دەدى تامارا دۇيسەنوۆا.
ول 2023 جىلدىڭ 1 شىلدەسىنە دەيىن ەڭبەك كودەكسىنە ادىستەمەنى زاڭنامالىق تۇرعىدان بەكىتۋ بويىنشا ءتيىستى تۇزەتۋلەر ازىرلەنەتىنىن ايتتى.