جۋرناليستيكا كوريفەيلەرى حالىقارالىق جۋرناليستيكانىڭ دامۋىنا قوسقان ۇلەسى ءۇشىن ماراپاتقا يە بولدى. سىيلىق دۇيسەنبى كۇنى تابىستالىپ، ۆالەريي جانداۋلەتوۆتىڭ 75 جىلدىعىنا ورايلاستىرىلدى.
اتالعان كەشتە باق-تا 50 جىل جۇمىس ىستەگەن كوممۋنيكاسيا شەبەرلەرى، قازىرگى قازاقستان تاريحىندا ماڭىزدى ءرول اتقارعان كوپتەگەن جوبالاردىڭ باستاماشىلارى ماراپاتتالدى. ماراپاتتاۋ راسىمىنە حالىق جازۋشىسى، قوعام جانە مەملەكەت قايراتكەرى، قازاقستاننىڭ ەڭبەك ەرى ولجاس سۇلەيمەنوۆ، ق ر ەڭبەك سىڭىرگەن قايراتكەرى، مادەنيەتتانۋشى مۇرات اۋەزوۆ، قازاقستاننىڭ جۋرناليستيكا اكادەمياسىنىڭ باسشىسى ساعىمباي قوزىبايەۆ، «Alataý aqparat» ج ش س باس ديرەكتورى تولەمىس كۇلمۇحامەدوۆ، ق ر جۋرناليستەر وداعىنىڭ باسقارما ءتوراعاسى سەيىتقازى ماتايەۆ، «نوۆايا گازەتا» باس ديرەكتورى الەكساندر كراسنەر جانە باسقا دا تانىمال جۋرناليستەر مەن قوعام قايراتكەرلەرى قاتىستى.
– ۆالەريي ايتمۇقاش ۇلى – ەلىمىزدەگى ەڭ تانىمال جۋرناليستەردىڭ ءبىرى. شىن مانىندە، ول ءومىر بويى وتاندىق باق-تا قىزمەت اتقاردى. ونىڭ قىزمەتى ديماش احمەت ۇلى قونايەۆ تۇسىندا باستالىپ، ەگەمەندىك ءداۋىرىنىڭ جاڭا ۋاقىتىمەن ۇشتاسىپ جاتىر، – دەپ ماراپاتتاۋ ءراسىمىن قازاقستان جۋرناليستيكا اكادەمياسىنىڭ باسشىسى اشتى.
ساعىمباي قوزىبايەۆ قازاقستان تاۋەلسىزدىگىنىڭ العاشقى جىلدارىنان باستاپ جانە كەلەسى ونجىلدىقتاردا ۆالەريي جانداۋلەتوۆ ەلىمىزدىڭ تۇڭعىش پرەزيدەنتىمەن بىرگە جۇمىس ىستەگەنىن، مەملەكەت باسشىسىنىڭ باسپا ءسوز قىزمەتىن، سودان كەيىن ونىڭ الماتى فيليالىن باسقارعانىن اتاپ ءوتتى.
– پرەزيدەنتپەن بىرگە ول الەمنىڭ كوپتەگەن ەلدەرىن ارالاپ، ەكۆاتورعا باردى. بۇل ساپارلار جاڭا تاۋەلسىز مەملەكەتتىڭ حالىقارالىق قاۋىمداستىققا كىرىگۋىندە ۇلكەن ءرول اتقاردى، – دەپ اتاپ ءوتتى جۋرناليستيكا اكادەمياسىنىڭ باسشىسى. سونداي-اق، ساعىمباي قوزىبايەۆ ەلىمىزدىڭ قالىپتاسۋى مەن دامۋىنا ارنالعان ونداعان پۋبليسيستيكالىق باسىلىمداردىڭ اۆتورى جانداۋلەتوۆ كىتاپتارىنىڭ ءبىر بولىگى شەت تىلدەرىنە اۋدارىلعانىن ەسكە سالدى.
كاسىبي قىزمەتىمەن قاتار ۆالەريي جانداۋلەتوۆ ازاماتتىق قوعامنىڭ دامۋىنا ەلەۋلى ۇلەس قوستى، ولجاس سۇلەيمەنوۆتىڭ انتيادرولىق قوزعالىستى ۇيىمداستىرۋ جانە دامىتۋ جونىندەگى ارىپتەسى بولعان.
– بۇگىندە ول «نيەۆادا–سەمەي» قوزعالىسى قۇرىلعانىنا 30 جىلدان استام ۋاقىت وتكەن سوڭ، قوعامدىق بىرلەستىكتىڭ جەتەكشىسى ولجاس سۇلەيمەنوۆپەن بىرگە يادروسىز الەم يدەيالارىن ىلگەرىلەتۋ بويىنشا جۇمىستى جالعاستىرۋدا، – دەپ اتاپ ءوتىپ، ساعىمباي قوزىبايەۆ سىيلىق لاۋرەاتىنا زور دەنساۋلىق جانە كاسىبي جانە قوعامدىق جۇمىستا ودان ءارى تابىستار تىلەدى. وسى تىلەكتەرگە قوسىلا وتىرىپ، «نوۆايا گازەتا» باس ديرەكتورى الەكساندر كراسنەر ۆالەريي جانداۋلەتوۆتىڭ جاقىندارىنا، دوستارىنا، ارىپتەستەرىنە دەگەن ىقىلاسىن جەتكىزدى:
– ءبىز ۆالەريي ايتمۇقاشۇلىن «باۋىرتاي» دەپ قازاقشا اتايمىز. بۇل اتاۋ ءوزى تۋرالى سىر اشادى – ول جولداسىمىزدىڭ مەيىرىمدىلىگىن، شىنايىلىعىن، ادامگەرشىلىگىن باسا كورسەتەدى، – دەدى ول.
قازاقستان جۋرناليستەر وداعىنىڭ باسشىسى سەيىتقازى ماتايەۆ ءوز كەزەگىندە ۆالەريي جانداۋلەتوۆتىڭ كوزقاراستارىنىڭ كەڭدىگىن اتاپ ءوتتى.
– باسپا ءسوز قىزمەتىندە جۇمىس ىستەي وتىرىپ، ول باسىلىمدارعا اقپاراتقا قول جەتكىزۋ بويىنشا تەڭ مۇمكىندىكتەر بەرىپ، ولاردى سول جانە وڭ، مەملەكەتتىك جانە جەكەمەنشىك نەمەسە قانداي دا ءبىر باسقا قاعيدات بويىنشا بولمەي، وسىنداي ءتاسىل ءبىزدىڭ باق-تى دامىتۋدىڭ ماڭىزدى تەتىگىنە اينالدى، – دەدى سەيىتقازى ماتايەۆ.
ول، سونداي-اق، ۆالەريي جانداۋلەتوۆتىڭ ءوز سوزىنە دەگەن جوعارى جاۋاپكەرشىلىگى مەن ادالدىعىمەن ەرەكشەلەنەتىنىن اتاپ ءوتتى:
– ەگەر ۆالەريي ايتمۇقاش ۇلى بىردەڭە ۋادە بەرسە، وندا ول مىندەتتى تۇردە ونى جاسايدى، ۇمىتپايدى – ول بارلىق ءىستى باقىلاۋدا ۇستايدى، – دەپ تۇيىندەدى.
وسى سوزدەردە سەيىتقازى ماتايەۆ ق ر جۋرناليستەر وداعىنىڭ اتىنان ۆالەريي جانداۋلەتوۆكە تاعى ءبىر ماراپات – ق ر جۋرناليستەر وداعىنىڭ التىن مەدالىن تابىس ەتتى.
سالتاناتتى ءراسىمدى اياقتاعان ساعىمباي قوزىبايەۆ بۇگىندە ۆالەريي جانداۋلەتوۆ باسپا جوبالارى مەن قوعامدىق باستامالاردىڭ ورتاسىندا جۇرگەنىن، ق ر جۋرناليستيكا اكادەمياسىنىڭ ۆيسە-پرەزيدەنتى، «نيەۆادا–سەمەي» قوزعالىسىنىڭ ۆيسە-پرەزيدەنتى بولىپ تابىلاتىنىن، يۋنەسكو اياسىندا مادەنيەتتەردى جاقىنداستىرۋ حالىقارالىق ورتالىعىنىڭ جەتەكشى عىلىمي قىزمەتكەرى بولىپ جۇمىس ىستەيتىنىن تىلگە تيەك ەتتى.
– ۆالەريي ايتمۇقاش ۇلى وسى باعىتتاردىڭ بارىندە جوعارى كاسىبيلىك تانىتادى، – دەپ قورىتىندىلادى ساعىمباي قوزىبايەۆ.
اتاپ وتەر جايت، ولجاس سۇلەيمەنوۆ اتىنداعى حالىقارالىق سىيلىق وتكەن جىلى اقىن جانە قوعامدىق-ساياسي قايراتكەردىڭ 85 جىلدىعىنا وراي تاعايىندالعان بولاتىن.