بۇل تۋرالى ىلە الاتاۋى ۇلتتىق پاركىنىڭ اۋماعىنداعى ايۋساي ۆيزيت-ورتالىعىندا ءوتىپ جاتقان قوڭىر ايۋ اپتالىعى اياسىنداعى ب ا ق وكىلدەرىنە ارنالعان باسپا ءسوز ءماسليحاتىندا ايتىلدى.
ماماندار جۋرناليستەر نازارىنا ۇلتتىق پاركتىڭ فلوراسى مەن فاۋناسى، ورناتىلعان فوتوتۇزاقتاردىڭ بىرەگەي كادرلارىنا ءىلىنىپ قالعان ءىرى جىرتقىشتار، سونىڭ ىشىندە تيان-شان قوڭىر ايۋى تۋرالى قۇندى مالىمەتتەردى ۇسىندى. ءتىپتى كورنەكىلىك رەتىندە ايۋدىڭ باس سۇيەگىن دە الا كەلىپتى.
– اق تىرناقتى ايۋ رەتىندە تانىمال تيان-شان قوڭىر ايۋى قازاقستاننىڭ قىزىل كىتابىنا ەنگىزىلگەن. الايدا سوڭعى جىلدارى قازاقستاندىق زوولوگتار مەن تابيعاتتى قورعاۋ جونىندەگى مەملەكەتتىك ينسپەكتورلاردىڭ ارقاسىندا ونىڭ ىلە الاتاۋى تاۋلارىنداعى پوپۋلياسياسى ايتارلىقتاي كوبەيدى. ق ر بعم عك زوولوگيا ينستيتۋتى عالىمدارىنىڭ ەسەپتەۋى بويىنشا، قازىرگى تاڭدا ىلە الاتاۋى ۇلتتىق پاركىنىڭ اۋماعىندا شامامەن 70 شاقتى تيان-شان قوڭىر ايۋى تىرشىلىك ەتەدى. ول ىلە الاتاۋىنىڭ ءار جەرىندە، سونىڭ ىشىندە اتىنا زاتى ساي ايۋساي شاتقالىندا دا تارالعان. 2010 جىلدان باستاپ، كوكتەمنەن كۇزگە دەيىن ءاربىر مەزگىل سايىن جىرتقىشتاردىڭ ىزدەرىن جانە باسقا دا نىشاندارىن تاۋىپ، تىركەيمىز، – دەيدى ق ر بعم عك زوولوگيا ينستيتۋتىنىڭ تەريولوگيا ءبولىمىنىڭ عىلىمي قىزمەتكەرى، حالىقارالىق ايۋلار جونىندەگى ماماندار اسسوسياسياسىنىڭ (IBA) مۇشەسى، ەكولوگيا ماگيسترى سانجار قاڭتاربايەۆ.
«ىلە الاتاۋى" مۇتپ عىلىمي-زەرتتەۋ جۇمىستارى جانە تاۋ اگروبيوارتۇرلىلىگى ءبولىمىنىڭ عىلىمي قىزمەتكەرى تۇڭعىش جاپارقۇلوۆ تاۋعا كەلۋشىلەرگە ارنالعان قاۋىپسىزدىك ەرەجەلەرىمەن تانىستىردى.
«ايۋ – ادام ءۇشىن ءقاۋىپتى ءارى مىقتى اڭ ەكەنىن ءتۇسىنۋىمىز كەرەك. سونىمەن قاتار ونىڭ تىرشىلىك ورتاسىنا بارماس بۇرىن دايىندالىپ، تىرشىلىگى تۋرالى ءبىلۋ قاجەت. ايۋساي ۆيزيت-ورتالىعىنىڭ قىزمەتكەرلەرى شاتقالدا دەمالاتىن ادامدارعا ءتۇسىندىرۋ جۇمىستارىن جۇرگىزىپ، ولاردان ءۇشىنشى سارقىرامادان جوعارى كوتەرىلمەۋىن وتىنەدى. ويتكەنى وندا ايۋلار سوقپاعى بار جانە ولاردى كەزىكتىرۋ ىقتيمالدىلىعى جوعارى. سوندىقتان تاۋعا اتتانباس بۇرىن قوڭىر ايۋ اپتالىعى اياسىندا وتەتىن دارىستەرگە قاتىسۋعا كەڭەس بەرەمىز»، – دەدى ول.
اتالعان ءبولىمنىڭ باستىعى سالتانات ۋسەربايەۆانىڭ ايتۋىنشا، ءىس-شارا ىلە الاتاۋى ۇلتتىق پاركىنىڭ اۋماعىندا تىرشىلىك ەتەتىن تيان-شان قوڭىر ايۋىنىڭ ۇيقىدان وياناتىن مەزگىلى، ياعني 15-21 ناۋرىز ارالىعىنا ورايلاستىرىلعان. اپتالىق اياسىندا الماتى قالاسىنداعى جوعارعى وقۋ ورىندارىنىڭ ستۋدەنتتەرىنە، مەكتەپ وقۋشىلارىنا، ورتالىق قوناقتارىنا ارنالعان تەگىن دارىستەر وتەدى. ولار قازاقستاننىڭ جەتەكشى تەريولوگتارىمەن تانىسىپ، ەكسكۋرسيالارعا قاتىسادى، «مىڭ كوز" سوقپاعىمەن (ۆيزۋالدىق تۇجىرىمداماسىنىڭ اۆتورى سانجار جۇبانوۆ) ءجۇرىپ وتىرىپ، ايۋدىڭ شىنايى ىزدەرىن تاماشالاپ، وزگە دە تىرشىلىك نىشاندارىن تانۋدى ۇيرەنەدى.
مۇنداي ءىس-شارالار قورشاعان ورتا ماسەلەلەرىنە قوعامنىڭ نازارىن اۋدارادى، وتانداستارىمىزدىڭ ەكولوگيالىق ۇستانىمىن جانە قالامىزدىڭ، وبلىسىمىزدىڭ تاۋ ەكوجۇيەلەرىن ساقتاۋعا دايىندىعىن دامىتۋعا كومەكتەسەدى.