"بەربانگ" قازاقستان كۇردتەرى اسسوسياسياسى باسقارما كەڭەسىنىڭ ءتوراعاسى، قازاقستان حالقى اسسامبلەياسى رەسپۋبليكالىق قورىنىڭ ءتوراعاسى، قازاقستان حالقى اسسامبلەياسىنىڭ مۇشەسى، كاسىپكەر-مەسەنات ميرزويەۆ رافيك ياكۋبوۆيچ وتانداستارىن انالار كۇنىمەن قۇتتىقتايدى.
– بۇگىن ەلىمىزدە انالار كۇنى. ادامزات ومىرىندەگى ەڭ اياۋلى جانعا وسىنداي داتالى كۇننىڭ ارنالعانىن وتە قۇپتايمىن. ايەل-انا – جارىق دۇنيەنىڭ، بارلىق قۋانىش، جاقسىلىقتىڭ باستاۋى. ول، ءتىپتى، قانشاما شاقىرىمدار الىستا تۇرسا دا، الىستا جۇرگەن بالاسىنىڭ اۋىرىپ قالعانىن سەزەتىن جان. سەبەبى، انا جۇرەگى جاھانداعى ەڭ سەزىمتال، ەڭ مەيىرىمدى جۇرەك دەر ەدىم.
وكىنىشكە قاراي، مەن انامنان تىم ەرتە، توعىز جاسىمدا ايىرىلعانمىن. شەشەم كوز جۇمعاندا نەبارى جيىرما جەتى جاستا بولىپتى. جايلاۋدا، تاۋ ەتەگىنەن قىزعالداقتار تەرىپ اكەلىپ سىيلاعانىم ەمىس-ەمىس ەسىمدە قالىپتى. كەيىن مۇسىلماندىق داستۇرمەن تۋعان ءسىڭلىسىن مەنىڭ اكەمە قوسقان. شىنىمدى ايتسام، تۋعان انامنىڭ جوقتىعىن ەش سەزبەي ءوستىم. ەكىنشى انام دا بارلىق مەيىرىم، شاپاعاتىن اياعان جوق، جاعامىزدى كىرلەتپەدى، كوڭىلىمىزگە كولەڭكە تۇسىرمەي ءوسىردى، جەتكىزدى. ءىنى، قارىنداس سىيلادى.
مەن ءقازىر وسىناۋ ءومىرىمدى اناسىز ەش ەلەستەتە الماس ەدىم. ءبىزدىڭ اۋلەتتەگى قالىپتاستان وتباسىلىق ءداستۇر – كىم قايدا جۇرمەيىك، انامىزدىڭ تۋعان كۇنىندە مىندەتتى تۇردە قانات بايلاپ ۇشىپ كەلىپ، ءبارىمىز جينالا قالامىز. ءبىزدىڭ اۋىزبىرشىلىگىمىزدى كورۋ – ول كىسى ءۇشىن ۇلكەن مەرەي. ول كىسى دە كەيىن اكەمنەن جاس قالدى. جاستىعىن، ۇيقىسىز تۇندەرىن، جىلى-جۇمساعىن تەك بىزگە ارنادى. ءالى كۇنگە سولاي. سونداي انانى قۇرمەتتەي الماۋ – بالاعا سىن!
ءبىزدىڭ بارلىق تويىمىزدىڭ تورىندە انام وتىرادى. انام باردا ءتورت قۇبىلام تەڭ ەكەنىن سەزىنۋدىڭ ءوزى ءبىر عانيبەت قوي. نەمەرەلەرى جان-جاعىندا شۇرقىراپ، مارە-سارە بولىپ جاتقاندا، كەيدە تولقىپ كەتەتىنىمدى جاسىرمايمىن.
اناسىن قادىرلەي العان ادامنىڭ الدىنان بارلىق ەسىك اشىلادى دەپ بىلەمىن ءوز باسىم. اكەم مەن انام ۇيلەنگەن جىلى، 8 ناۋرىزدا ءبىراز ۋاقىت جيناپ جۇرگەن اقشاما دۇكەننەن ءاتىر ساتىپ الىپ، اناما سىيلاعانىم بار. 3-سىنىپتا وقيتىنمىن. بالا دا بولسام سولاي قۋانتقىم كەلگەن بولار، بىزگە دەگەن مەيىرىمىنە كىشكەنتاي سىيلىعىم ارقىلى العىس ايتقىم كەلگەن شىعار بالكىم. ءالى كۇنگە سىيلىعىمدى ۇزگەن ەمەسپىن. قىزمەتىمە بايلانىستى ءىسساپارلارعا ءجيى شىعىپ كەتەمىن. سوندا ءبىرىنشى كەزەكتە اناما سىيلىق ساتىپ الامىن. ءبىز ءقازىر بولەك تۇرامىز. سىيلىعىمىزدى الىپ، ۇلكەن شاڭىراققا كىرىپ شىعۋ، امانداسۋ، جاعدايىن سۇراۋ – ونىڭ ءوزى انانىڭ ءومىرىن ۇزارتادى، جانىنا تىنىشتىق بەرەدى.
راس، ەسەيىپ كەلە جاتقاندىعىمىزدىڭ بەلگىسى مە، كەيدە تۋعان شەشەممەن ويشا سىرلاساتىن ساتتەرىم بولادى. كوز الدىمدا قالىپ قويعان اياۋلى بەينەسى جۇرەگىمدى قوزعاپ تا جىبەرەدى كەيدە.
مەن بارلىق انانى قۋانتقىم كەلىپ تۇرادى. ءبىز كومەككە مۇقتاج كوپبالالى انالارعا، جالعىزىلىكتى جاندارعا ۇنەمى كومەك قولىن سوزىپ جۇرەمىز. انالار مۇڭايماسىن، اۋىرماسىن دەگىم كەلەدى.