برازيليا – الەم چەمپيوناتىن بەس رەت جەڭىپ العان ءارى وسى جەتىستىگى جاعىنان بارىنەن وزىق قۇراما. فۋتبول تالانتتارىنا وتە باي ەل بيىل دا باستى فاۆوريت بولىپ سانالادى.
قۇرامىندا ىلعي ىعاي مەن سىعايلار. اسىرەسە، شابۋىلشىلارىنان فۋتبول جانكۇيەرلەرى عانا ەمەس، ەن دالادا جايىلىپ جۇرگەن ات ۇركەدى. ەگەر ءوز مۇمكىندىكتەرىن تولىعىمەن پايدالانىپ، جۇزەگە اسىرسا، ولار ءۇشىن چەمپيون بولۋ سونشالىقتى قيىن ەمەس.
ەڭ باستىسى، باس باپكەرى تيتە قورعانىسقا ەرەكشە نازار اۋدارىپ ءجۇر. سونىڭ ارقاسىندا، برازيليا قۇراماسى كەيىنگى ويىنداردا ءوز قاقپاسىنا گول جىبەرىپ الىپ، جازا باسۋدى كۇرت تومەندەتتى. 39 جاستاعى داني الۆەستەن باسقاسى ەۋروپادا وينايدى. سەگىز قورعاۋشىسىنىڭ ۇشەۋى «يۋۆەنتۋس» كلۋبىنىڭ نامىسىن جىرتادى.
ايتسە دە، قورعانىسىنىڭ توپساسى وتە بەرىك دەپ ايتا المايمىز. ميليتاو، برەمەر، ماركينوستان باسقالارى 30-دان اسىپ كەتكەن. قورعاۋشىلارى دا اتويلاپ العا شاۋىپ، گول سالعاندى تەرىس كورمەيدى. سودان سوڭ... ويىن ەرەجەسىن بۇزىپ، ەسكەرتۋ الاتىندارىن دا جوققا شىعارا المايمىز.
قاقپاشىسى اليسون ءدال ءقازىر سپورتتىق بابىندا ما؟! بۇل رەتتە، «ليۆەرپۋل» كلۋبىنىڭ قازىرگى جاعدايى اسا ءماز ەمەس. جارتىلاي قورعانىسى مەن شابۋىلىنىڭ اراجىگى الشاقتاۋ سەكىلدى. بۇل تۇرعىدا كازەميرو، فرەد، فابينو جانە پاكەتا تورتەۋىنىڭ بىرەۋى «جىرتىققا» جاماۋ بولا الا ما؟
ەگەر نەيمار «قارا جۇمىستى» ءوز موينىنا الىپ، جارتىلاي قورعاۋشىلارى مەن شابۋىلشىلارىنىڭ اراسىنا ۇيىتقى بولا السا، اڭگىمە بولەك. ۆينيسيۋس پەن انتوني دە بار. جۇلدىزدارىنىڭ ءبارى دە جەكە باستارىنىڭ مۇددەسىن ەمەس، كوماندالىق جەتىستىككە كوڭىل بولسە، «پەنتاكامپەوندار» ءۇشىن الىنبايتىن قامال جوق.
ال شابۋىلى دەرسىز؟ شابۋىلى – قۇيىن! ءارى نەيماردان باسقاسى 21، 22 جانە 25 جاستاعى – جەر تارپىعان دۇلدۇلدەر. باياعىداي، «ەڭ جاقسى قورعانىس – شابۋىل» دەپ، تايلى-تاياعىمەن العا قاراي لاپ قويسا دا بولار ەدى. ءبىراق تيتەنىڭ تىلدى ويلايتىن ساقتىعى دۇرىس سياقتى. ءشوپتى ۇزاق شاپساڭ، شالعىنىڭ ءوزى تاسقا تيسە، ءجۇزى مۇقالىپ قالماي ما؟
«ۇلى سوزدە ۇيات جوق»، دەيدى قازەكەم. بۇل ەلدىڭ تالانتتارىن «قۇرتاتىن» ەڭ كەلەڭسىز قىلىقتارى مەن مىندەرى – ولاردىڭ ويىن-ساۋىققا اۋەستىكتەرى مەن قىزقۇمارلىقتارى. ايگىلى برازيليا كارناۆالدارىندا شالقىپ وسكەن، كوپاكابانا جاعاجايلارىندا وزدەرىن ەركىن ۇستايتىن فۋتبولشىلارى دا سۇلۋ كورسە، كوزدەرى وتتاي جانادى.
ال ونداي سۇلۋ بيكەشتەر كوزدەرىمەن تاناداي «سۇزەتىن» بولسا، وندا ولار «باس جىپتەرىن» الەم چەمپيوناتىندا ۇزە بەرەتىن شىعار-اۋ. رونالدو دا، ريۆالدو دا، ادريانو دا، ءتىپتى رونالدينو دا وسىنداي اقجارقىن، اقكوڭىل مىنەزدەرىنىڭ كەسىرىنەن مەسسي مەن كريشتيانۋ رونالدۋدان قالىپ قويدى. ولار ءتىپتى «وسى لەو مەن كر مۇلدە قىزدارعا بارمايتىن شىعار» دەپ، تاڭداناتىن دا سەكىلدى عوي...
ءتىپتى، سوناۋ 60-70 جىلدارى، سول اياعى وڭ اياعىنان 6 سم قىسقا گاررينچانىڭ وزىندە بىرنەشە ايەلدەن كەمى 14 بالاسى بولعان. نورۆەگياداعىسى ول، ءوز الدىنا – ءبىر شەجىرە. ەدەن جۋۋعا كەلگەن قىزمەتكەر قىزدى ۇستاپ الىپ... 15 مينۋتتىڭ ىشىندە بار شارۋاسىن بىتىرگەن. ال ول كامەلەتكە تولماعان، جەتىم قىز بولىپ شىعىپ، ارتى سوتقا دەيىن ۇلاسىپ، حالىقارالىق دەڭگەيدەگى شۋ بولعان...
قازاق «جاياۋ مۇسا» رومانىنداعىداي، كەش باتسا، «اقسۇيەك» ويناپ، بۇتا-جىڭعىلدىڭ تۇبىنە اۋناي كەتەتىندىگىن قويىپ، ءتىپتى وندايدى مۇلدە ۇمىتقان. ال برازيليالىقتار قۇمداۋىت جاعاجايعا اۋناي كەتەتىندىكتەرىن قويماعان سياقتى عوي. تسس... سۇلۋ قىزداردى ولارعا قارسى قولدانۋعا دا بولاتىن شىعار، ءا؟..
قورىتىندى: برازيليا قۇراماسىنىڭ الەۋەتى مەن مۇمكىندىگى وزگەلەرىمەن سالىستىرعاندا، الدەقايدا جوعارى. ايتسە دە، مەن ولار چەمپيون بولادى دەگەنگە تولىق سەنبەيمىن. تەمىردەي تارتىپكە نوقتالانعان قۇراما ولاردى سان سوقتىرىپ كەتۋى ابدەن مۇمكىن.