مىڭنان استام وقۋشى ۇلتتىق اسپاپپەن بەلگىلى كۇيلەردى ورىندادى.
بۇگىن ەلورداداعى فيزيكا-ماتەماتيكا باعىتىنداعى زياتكەرلىك مەكتەپتە وتكەن دومبىرا ساباعى گيننەستىڭ رەكوردتار كىتابىنا ەنگىزىلەدى. ەلورداداعى فيزيكا-ماتەماتيكا باعىتىنداعى نزم-دە 2021-2022 وقۋ جىلى دومبىرا ساباعىمەن اياقتالدى. بۇل ساباققا 1 032 وقۋشى قاتىستى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
ساباقتى قوسىمشا ءبىلىم بەرۋ پەداگوگى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى ايتجان توقتاعان وتكىزدى. وقۋشىلار «سارىارقا»، «بالبىراۋىن»، «ەركەم-اي»، «كەڭەس»، «جاستار ءبيى» سىندى تانىمال كۇيلەردىڭ شىعۋ تاريحىن بايانداۋمەن قاتار، اتالعان تۋىندىلاردى بىرگە ورىندادى.
ەل استاناسىنداعى فيزيكا-ماتەماتيكا باعىتىنداعى NIS-تە دومبىرا بويىنشا ەللەكتيۆتى كۋرستار 2016 جىلى ەنگىزىلدى. ايتجان توقتاعانوۆتىڭ جەتەكشىلىگىمەن قۇرىلعان مەكتەپىشىلىك «جىگەر» ءانسامبلى - كوپتەگەن رەسپۋبليكالىق جانە حالىقارالىق مۋزىكالىق بايقاۋلاردىڭ جەڭىمپازى، «Sun of Italy» يتالياندىق فەستيۆال-بايقاۋىنىڭ باس جۇلدە يەگەرى، اقش-تىڭ اتاقتى گارۆارد پەن بوستون ۋنيۆەرسيتەتتەرى جانە ماسساچۋسەتس تەحنولوگيالىق ينستيتۋتى ساحنالارىندا ونەر كورسەتتى.
Guinness World Records-قا (GWR) ءوتىنىم 2021 جىلدىڭ جەلتوقسان ايىندا بەرىلگەن بولاتىن.
كۋاگەرلەر GWRء-دىڭ سەنىمدى وكىلى رەتىندە قىزمەت اتقارىپ، رەكوردتىڭ ورناۋى مەن كىتاپتىڭ بارلىق كريتەرييلەرىنىڭ تولىق ساقتالۋىن قامتاماسىز ەتەدى.
Guinness World Records ەرەجەلەرىنە سايكەس اۋقىمدى ساباق باستالار الدىندا بارلىق قاتىسۋشىلار ەكى تىركەۋ پۋنكتىنەن وتەدى: ءبىرىنشىسى – جەكە بەيدجدەرىن سكانەرلەيدى جانە «كانديدات-ماركەر» باعدارلاماسى ارقىلى ايماققا كىرەدى، ەكىنشىسى – كەزەكشى قاتىسۋشىلاردىڭ مەحانيكالىق ەسەبىن جۇرگىزەدى.
ءبىر مەكتەپتىڭ مىڭعا جۋىق وقۋشىسى ۇلتتىق مۋزىكالىق اسپاپتى جەتىك مەڭگەرىپ، بىرگە كۇي ورىنداۋى - الەمدەگى تۇڭعىش وقيعا. سوندىقتان قازاقستاندىق رەكورد اسا كورنەكتى جەتىستىكتەر مەن بىرەگەي قۇبىلىستار تۋرالى جاھاندىق انىقتامالىققا ەنگىزىلەدى دەپ جوسپارلانىپ وتىر.
بۇگىنگى تاڭدا ەلىمىزدەگى بارلىق NIS-تە دومبىرا ءپانىنىڭ ەللەكتيۆتى كۋرستارى ەنگىزىلىپ، ونىڭ اياسىندا قۇرمانعازى ساعىرباي ۇلى، تاتتىمبەت قازانعاپ ۇلى، نۇرعيسا تىلەندييەۆتىڭ اتاقتى كۇيلەرىنىڭ تاريحى مىندەتتى تۇردە وقىتىلادى، ال ەڭ تانىمال جوبالاردىڭ قاتارىندا «100 كۇيدىڭ تاريحى» جوباسى، بارلىق مەكتەپتەردە دومبىرا انسامبلدەرى مەن ستۋديالارى جۇمىس ىستەيدى، دومبىرا ساباقتارى ماتەماتيكا، فيزيكا، شەت ءتىلى ساباقتارىمەن ۇشتاستىرىلىپ، جاس مۋزىكانتتار «ۇلى دالا مۇراگەرلەرى» ءداستۇرلى فلەشموبىندا جىل سايىن ەل ساحنالارىن باعىندىرىپ كەلەدى.