الماتى قالاسىنىڭ اكىمى ەربولات دوسايەۆتىڭ مەكتەپ تۇلەكتەرىنە ۇندەۋى
قىمباتتى جاس تۇلەكتەر!
سىزدەر ءۇشىن بۇگىن – ەرەكشە كۇن. ويتكەنى جۇرەكتەرى قۋانىش پەن ارمانعا تولى ءاربىر تۇلەك ءۇشىن بۇل ءسات – جاڭا بەلەستىڭ باستاماسى. وسىدان 11 جىل بۇرىن مەكتەپكە تارىداي بولىپ كىرىپ، تاۋداي بولىپ شىققالى تۇرسىزدار.
بيىلعى جىلى قالا مەكتەپتەرىن 12 مىڭنان استام تۇلەك اياقتاعالى وتىر. الدا ۇلكەن سىناق – مەملەكەتتىك ەمتيحان جانە ۇلتتىق ءبىرىڭعاي تەستىلەۋ. وسى سىننان بارلىعىڭىزدىڭ سۇرىنبەي وتۋلەرىڭىزگە شىن جۇرەكتەن تىلەكتەسپىن.
العان بىلىمدەرىڭىزدىڭ ارقاسىندا سىزدەر الەمنىڭ نەمەسە ەلىمىزدىڭ كەز كەلگەن جوعارى وقۋ ورنىن تاڭداي الاسىزدار. تەك الماتىنىڭ وزىندە 36 جوعارى وقۋ ورنى بار. تاڭداعان وقۋ ورىندارىڭىزعا ءتۇسىپ، قالاعان ماماندىق يەسى بولىڭىزدار.
ارماندارىڭىزعا قول جەتكىزىپ، اتا-انالارىڭىزدىڭ، ۇستازدارىڭىزدىڭ ءۇمىتىن اقتاڭىزدار. ەلىمىزدىڭ، اسەم قالامىزدىڭ اتىن پاش ەتىپ، بيىكتەن كورىنە بەرىڭىزدەر!