ەڭ ارزان ءۇي قاي وڭىردە؟

ءساۋىر ايىنىڭ قورىتىندىسى بويىنشا ەڭ ارزان جانە ەڭ قىمبات تۇرعىن ۇيلەر ورنالاسقان وڭىرلەر بەلگىلى بولدى، دەپ حابارلايدى aqshamnews.kz

اناليتيكتەر ەلدىڭ 18 قالاسىنداعى ەكىنشى دەڭگەيلى تۇرعىن ءۇي نارىعىنداعى ۇسىنىستاردى زەرتتەگەن.

Krisha.kz ساراپشىلارى ەسەپتەۋ كەزىندە پاتەرلەردىڭ ورتاشا اۋداندارىن نەگىزگە الدى:

1 بولمەلى پاتەر — 35 شارشى مەتر؛

2 بولمەلى پاتەر — 47 شارشى مەتر؛

3 بولمەلى پاتەر — 70 شارشى مەتر.

زەرتتەۋ ناتيجەسىندە رەسپۋبليكا بويىنشا پاتەرلەردىڭ ورتاشا باعاسى تومەندەگىدەي بولدى:

1 بولمەلى پاتەر — 13،6 ملن تەڭگە؛

2 بولمەلى پاتەر — 18،3 ملن تەڭگە؛

3 بولمەلى پاتەر — 27،3 ملن تەڭگە.

ەڭ ارزان ۇيلەر قاي وڭىردە

ەكىنشى دەڭگەيلى نارىقتاعى ەڭ تومەن باعالار قىزىلوردا قالاسىندا تىركەلگەن. بۇل بارلىق فورماتتاعى پاتەرلەرگە قاتىستى:

1 بولمەلى پاتەر — 8،7 ملن تەڭگە؛

2 بولمەلى پاتەر — 11،7 ملن تەڭگە؛

3 بولمەلى پاتەر — 17،5 ملن تەڭگە.

سونداي-اق، ەڭ ارزان باسپانا ساتىلاتىن قالالار قاتارىندا تاراز، اقتوبە، تالدىقورعان جانە كوكشەتاۋ بار.

ەڭ قىمبات ۇيلەر قاي وڭىردە

ەكىنشى دەڭگەيلى نارىقتاعى ەڭ قىمبات باسپانا الماتىدا. مۇندا ءبىر شارشى مەتردىڭ ورتاشا باعاسى — 751 055 تەڭگە. بۇل كورسەتكىش ەڭ جاقىن «باسەكەلەس» قالاعا قاراعاندا 233 000 تەڭگەگە جوعارى.

الماتىداعى ءساۋىر ايىنداعى پاتەر باعالارى:

1 بولمەلى پاتەر — 26،3 ملن تەڭگە؛

2 بولمەلى پاتەر — 35،3 ملن تەڭگە؛

3 بولمەلى پاتەر — 53 ملن تەڭگە.

الماتىدان كەيىنگى قىمبات قالالار تىزىمىندە استانا مەن شىمكەنت تۇر.