ءقازىر الەمنىڭ ءار تۇكپىرىندەگى سپورتسۇيەر قاۋىم ءبىزدىڭ گيمندى، كوك تۋىمىزدى جاقسى بىلەدى. دەسە دە، الەمدىك دودالاردا التى الاشتىڭ كوك بايراعى العاش رەت قاي جىلى كوتەرىلدى؟ ءانۇرانىمىزدى ەڭ العاش رەت قاي سپورتشىمىز، قاي جىلى اسقاقتاتتى؟ كىم بىلەدى؟
بۇل تاقىرىپ ءالى كۇنگە دەيىن سپورتشىلار اراسىندا داۋلى ماسەلە كۇيىندە قالىپ وتىر. ءبىزدىڭ بىلەتىنىمىز، تورتكۇل دۇنيەنى مويىنداتىپ، ەڭ العاشقىلاردىڭ ءبىرى بولىپ ءانۇرانىمىزدى شىرقاتقان سپورتشى – 17 جاسار الماتىلىق ەكاتەرينا پوليەۆايا ەدى.
ەشكىمگە بەلگىسىز جاس سپورتشى ءوزىنىڭ دوسى، سول كەزدەگى سۋ استىنداعى باعدارلاۋ بويىنشا كسرو قۇراماسىنىڭ ەۋروپا چەمپيونى ليۋدميلا شۋميلوۆامەن بىرگە 1992 جىلى اۆستريانىڭ فەلدكيرح قالاسىندا وتكەن الەم چەمپيوناتىنا بارادى. سۋ استىنداعى سپورتتىڭ «باعدارلاۋ» جاتتىعۋىندا ە.پوليەۆايا ءبىرىنشى ورىندى يەلەنەدى.
بۇل تۋرالى بۇگىندە سۋاستى سپورتىنىڭ باپكەرى بىلاي دەپ ەسكە الادى: «جارىسقا كەتەردىڭ الدىندا ءبىر نارسەنى سەزگەندەي ءبىرتۇرلى قىزىق سەزىمدە بولدىم. ۇلتتىق وليمپيادا كوميتەتىنە بارىپ، ەل تۋىن سۇراپ الدىم. راديوعا بارىپ قازاقستاننىڭ ءانۇرانىن جازدىرىپ الدىم. سويتسەم، ءبارىن دۇرىس ىستەپپىن. مايشافەرزەە كولىنىڭ جاعاسىندا تۇرعان مىڭداعان جانكۇيەر كوك جۇزىمەن تالاسا جەلبىرەگەن كوك بايراعىمىزدى تاماشالادى. سونداي-اق، الەم كارتاسىندا جاڭادان پايدا بولعان مەملەكەتتىڭ ءانۇرانىن دا شامامەن 5 مينۋت تىڭدادى. ول-ول ما، ءبىر جاعدايعا بايلانىستى ۇيىمداستىرۋشىلار ءانۇرانىمىزدى ەكى رەت قوسىپ جىبەردى»…
وسىلايشا ەكاتەرينا پوليەۆايا قازاق ەلى سپورتىنىڭ تاريحىنا ونىڭ قۇرمەتىنە العاش رەت قازاقستاننىڭ ءانۇرانى شىرقالعان جانە ەگەمەن ەلدىڭ العاشقى الەم چەمپيونى اتانعان سپورتشى رەتىندە ەندى. ءانۇرانىمىزدى سپورتشىلاردىڭ وزدەرى جاندى داۋىستا ايتقان جاعدايلار دا بولعان ەكەن.
– فرانسيادا ويناپ ءجۇرمىز، – دەپ باستادى ءسوزىن الماتىنىڭ «ايسۇلۋ» اتتى حوككەيشىلەر كومانداسىنىڭ باپكەرى ا.ي.مالسيەۆ. – ماچ باستالماي تۇرىپ قازاقستان مەن ەۋروپادان كەلگەن قارسىلاستاردىڭ ءانۇرانى وينالۋى ءتيىس ەدى. ءبىراق ءبىزدىڭ مەملەكەتىمىزدىڭ ءانۇرانى جازىلعان ديسك بەلگىسىز ءبىر سەبەپتەرمەن «وقىلماي» قويدى. نە ىستەرىمىزدى بىلمەي تۇرعاندا، سپورتشىلاردىڭ بىرەۋى قاسىما كەلىپ: «ءبىز ءانۇراندى جاندى داۋىستا ايتامىز»، – دەدى.
مەنىڭ عانا ەمەس، ماچتى كورۋگە جينالعان كورەرمەندەردىڭ دە تاڭدانىسىندا شەك بولمادى. ستاديون ءبىزدى ۇلكەن قوشەمەتپەن قارسى الدى. جۇرەكتى تەبىرەنتكەن ادەمى كورىنىس بولدى. ياعني ءوز ەلىڭنىڭ پاتريوتى ەكەنىڭدى سوزبەن ەمەس، ىسپەن دالەلدەگەن ءسات ەدى بۇل.
قىزدار ءانۇراندى جاتقا ايتتى. سپورتشىلارىمىز جاڭا ءانۇراننىڭ ءماتىنىن دە جاتقا بىلەدى. ويتكەنى، سپورت الەمىندە نەشە ءتۇرلى ءبىز كۇتپەگەن نارسەلەر ورىن الىپ جاتادى. مىسالى، جاڭا ءانۇرانىمىزدىڭ ءماتىنى بارلىق ەلدە جوق. كەيبىر مەملەكەتتەردە، ءتىپتى كورشى تۇرعان مىنا قىتايدا دا وسىنداي جاعدايعا تاپ بولعان ەدىك.
جارىستى ۇيىمداستىرۋشىلار ءانۇراننىڭ ەسكى نۇسقاسىن قويىپ جىبەرگەن كەزدەر تالاي بولدى. سوندىقتان بارىنە دايىن بولۋ كەرەك.