ديماش قۇدايبەرگەن جاڭا ءاننىڭ پرەمەراسىن جاريالادى

ءانشىنىڭ فاندومىنا 8 جىل بولىپتى.

قازاقستاندىق ءانشى ديماش قۇدايبەرگەن ءوزىنىڭ فاندومىنىڭ 8 جىلدىعىنا وراي سۋ جاڭا ءاننىڭ پرەمەراسىن جاريالادى، دەپ حابارلايدى aqshamnews.kz

قۇدايبەرگەن ءوز جانكۇيەرلەرىنە ارناعان ۇندەۋىندە 30 قاڭتار مەرەكە ەكەنىن ايتتى.

"قۇرمەتتى دوستار، مەنىڭ سۇيىكتىلەرىم Dears! بۇگىن 30 قاڭتار – ءبىزدىڭ ورتاق مەرەكەمىز. 2017 جىلعى سول ءبىر ەستە قالارلىق كۇننەن باستاپ، سىزدەرگە العاش رەت وسىلاي Dears دەپ اتاعانىما بۇگىن 8 جىل تولىپ وتىر. وسى جىلدار ىشىندە ءبىز كونسەرتتىك تۋرلارىممەن قازاقستاننان باستاپ ازيا، امەريكا، ەۋروپاعا دەيىنگى كوپتەگەن قالالار مەن ەلدەردى ارالادىق… سىزدەردىڭ ەرەكشە ىقىلاستارىڭىز بەن قولداۋلارىڭىز ءۇشىن، مەنىڭ شىعارماشىلىعىما قىزىعۋشىلىق تانىتىپ، ماعان سەنىم ارتقاندارىڭىز ءۇشىن سىزدەرگە ايتار العىسىم شەكسىز"،- دەپ جازدى ول.

ءارى قاراي ءانشى مەرەكەگە وراي جاڭا ءاننىڭ پرەمەراسىن جاريالادى.

"7 ناۋرىزدا الەمگە ايگىلى كومپوزيتور جانە پروديۋسەر ۆالتەر افاناسيەۆتىڭ جەتەكشىلىگىمەن حالىقارالىق اۆتورلار ۇجىمى جاساعان تۋىندىنى جارىققا شىعارامىز. بۇل "Love’s not over yet" ءانى. سىزدەرگە ۇنايدى دەگەن ۇمىتتەمىن!"، دەپ جازدى ديماش قۇدايبەرگەن.