مەملەكەت باسشىسى قاسىم-جومارت توقايەۆ قازاقستان رەسپۋبليكاسى مەن تاجىكستان رەسپۋبليكاسى اراسىنداعى دوستىق پەن ىنتىماقتاستىقتى نىعايتۋعا قوسقان ايرىقشا ۇلەسى ءۇشىن تاجىكستان پرەزيدەنتى ەمومالي راحموندى ەلىمىزدىڭ ەڭ جوعارى مەملەكەتتىك ناگراداسى – «التىن قىران» وردەنىمەن ماراپاتتادى، دەپ حابارلايدى Almaty-akshamy.kz. اقورداعا سىلتەمە جاساپ.
قاسىم-جومارت توقايەۆ قازاقستان مەن تاجىكستاننىڭ باۋىرلاس حالىقتارى اراسىنداعى دوستىقتى، ءوزارا تۇسىنىستىك پەن ىنتىماقتاستىقتى نىعايتۋعا ەمومالي راحموننىڭ قوسقان وراسان زور ۇلەسىن اتاپ ءوتتى.
«ءبىز ءاردايىم بارلىق دەڭگەيدەگى تىعىز جانە سەنىمدى ساياسي ديالوگتى قولدايمىز. ەلدەرىمىز اراسىندا بەرىك شارتتىق-قۇقىقتىق بازا قالىپتاستى. ساۋدا-ەكونوميكالىق ىنتىماقتاستىق قارقىندى دامىپ، مادەني-گۋمانيتارلىق بايلانىستاردىڭ اياسى ۇدايى كەڭەيىپ كەلەدى. ءبىز ورتالىق ازياداعى جان-جاقتى ىنتىماقتاستىقتى نىعايتۋعا ۇلەس قوسا وتىرىپ، اسا ماڭىزدى حالىقارالىق قۇرىلىمدار اياسىندا ءوزارا تابىستى ارەكەت ەتىپ كەلەمىز. بۇگىندە مەملەكەتارالىق بايلانىستارىمىزدىڭ وداقتاستىق قاتىناس دەڭگەيىنە كوتەرىلگەنى قۋانتادى. بۇل ءسىزدىڭ ەكى ەل اراسىندا ۇلگىلى قارىم-قاتىناس قالىپتاستىرۋعا ەرەكشە اتسالىسقانىڭىزدىڭ ناتيجەسىندە مۇمكىن بولدى»، – دەدى مەملەكەت باسشىسى.
ءوز كەزەگىندە ە.راحمون ەلدىڭ جوعارى مەملەكەتتىك ناگراداسىمەن ماراپاتتالعانىنا ريزاشىلىعىن ءبىلدىردى.
«قۇرمەتتى قاسىم-جومارت كەمەل ۇلى، مەنى «التىن قىران» وردەنىمەن ماراپاتتاۋ جونىندە شەشىم قابىلداعانىڭىز ءۇشىن سىزگە العىس ايتامىن. بۇل ناگرادا، ەڭ الدىمەن، بۇكىل تاجىكستان حالقىنىڭ تاجىك-قازاق قاتىناستارىن، دوستىعى مەن ىنتىماقتاستىعىن دامىتۋعا جانە نىعايتۋعا قوسقان ۇلەسى ءۇشىن بەرىلگەن جوعارى باعا دەپ بىلەمىن. باۋىرلاس حالىقتارىمىزدىڭ يگىلىگى ءۇشىن تاجىكستان مەن قازاقستان اراسىنداعى ستراتەگيالىق سەرىكتەستىكتى جان-جاقتى نىعايتۋعا جانە كەڭەيتۋگە الداعى ۋاقىتتا دا بار كۇش-جىگەرىمىزدى سالاتىنىمىزعا سەنىمدىمىن»، - دەدى تاجىكستان باسشىسى.
ايتا كەتەيىك، كەشە قاسىم-جومارت توقايەۆ قازاقستانعا مەملەكەتتىك ساپارمەن كەلگەن تاجىكستان پرەزيدەنتى ەمومالي راحموندى ەلوردا اۋەجايىندا قارسى الدى.
ال 3 مامىردا قازاقستان-تاجىكستان بيزنەس-فورۋمىندا ءبىرقاتار ماڭىزدى قۇجاتقا قول قويىلدى.
بۇگىن قوس ەلدىڭ باسشىلارى شاعىن قۇرامداعى كەلىسسوز وتكىزدى. ءوز كەزەگىندە ە.راحمون استاناعا مەملەكەتتىك ساپارمەن كەلۋگە شاقىرعانى جانە قازاق حالقىنىڭ ءداستۇرلى قوناقجايلىعى ءۇشىن قاسىم-جومارت توقايەۆقا العىس ايتتى.