وتكەن جىلى ءىىم م.ەسبولاتوۆ اتىنداعى الماتى اكادەمياسىندا ەلىمىز ەگەمەندىك العان 30 جىلدىڭ ىشىندە قىزمەت بابىندا قازا تاپقان اكادەميا تۇلەكتەرىنە ارنالعان ەسكەرتكىش اشىلعان بولاتىن.
مەموريالدى ەسكەرتكىشتىڭ تاس تۇعىرىنا 32 پوليسيا قىزمەتكەرىنىڭ ەسىمى قاشالىپ، ەسكەرتكىشتىڭ ەكى قاناتىنا ولاردىڭ سۋرەتتەرى قويىلعان. وتان قورعاۋشىلار كۇنى قارساڭىندا وسى ەسكەرتكىش-اللەياعا اكادەميانىڭ قازا تاپقان تۇلەكتەرىنىڭ رۋحىنا ارناپ 32 اق قايىڭ وتىرعىزىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
اتالعان ءىس-شاراعا العاشقى كاسىبي دايارلىق كۋرسىنىڭ تىڭداۋشىلارى قاتىسىپ، “قىزمەتتىك مىندەتتەرىن اتقارۋ كەزىندە قازا تاپقان اكادەميا تۇلەكتەرىنە” ارنالعان مەموريالعا گۇل شوقتارىن قويدى. اق قايىڭدار اللەياسىن اشۋ كەزىندە اكادەميا باستىعى ا.سايتبەكوۆ ءسوز سويلەدى.
«قازاقستان پوليسياسىنىڭ 30 جىلدىعى قارساڭىندا اشىلعان بۇل ەسكەرتكىش حالىق تىنىشتىعى ءۇشىن قۇربان بولعان ارىپتەستەرىمىزگە دەگەن قۇرمەت بولاتىن. مەموريالدى ەسكەرتكىش تاسقا ەسىمدەرى جازىلعان پوليسيا قىزمەتكەرلەرى – ومىرلەرىنىڭ سوڭىنا دەيىن وتان الدىندا قابىلداعان انتتارىنا ادالدىق تانىتقان بەيبىت كۇننىڭ باتىرلارى. ولاردىڭ ەرلىك ىستەرى بولاشاق وفيسەرلەر ءۇشىن ەرلىك پەن ادالدىقتىڭ ۇلگىسى. بۇگىنگى وتىرعىزىلعان اق قايىڭدار باتىر دا باتىل ارىپتەستەرىمىزدىڭ رۋحىنا دەگەن تاعى ءبىر ۇلكەن قۇرمەت جانە بولاشاق پوليسيا قىزمەتكەرلەرى تاربيەنىڭ ءبىر كورىنىسى»، – دەدى م.ەسبولاتوۆ اتىنداعى الماتى اكادەمياسىنىڭ باستىعى ا.سايتبەكوۆ.
اق قايىڭ وتىرعىزۋ جۇمىسىنا اكادەميا قىزمەتكەرلەرىمەن بىرگە تىڭداۋشىلار دا بەلسەندى تۇردە ات سالىستى. بۇل سالتاناتتى ءىس-شارا ىشكى ىستەر ورگاندارىنا العاش كىرگەن تىڭداۋشىلاردىڭ قوعامدىق ومىرگە بەلسەندى قاتىسۋعا، سالاۋاتتى ءومىر سالتىن ۇستانۋعا، جالپى مادەني جانە كاسىبي ءوي-ورىسىن دامىتۋعا ىقپال ەتە وتىرىپ، ولاردىڭ مورالدىق، ىسكەرلىك جانە كاسىبي قاسيەتتەرىن ۇشتايتىنى انىق. سالتاناتتى جيىن سوڭىنان اكادەميا باستىعى جاس قىزمەتكەرلەرمەن، تىڭداۋشىلارمەن ەستەلىككە فوتوسۋرەتكە ءتۇستى.