ەربولات دوسايەۆ الماتىداعى قالقامان شاعىن اۋدانىنداعى № 7 قالالىق كلينيكالىق اۋرۋحانانىڭ جانىنداعى ەمحاناعا كۇردەلى جوندەۋ جۇرگىزۋدى تاپسىردى، دەپ حابارلايدى Almaty-akshamy.kz
ناۋرىزباي اۋدانىنا جۇمىس ساپارى بارىسىندا الماتى اكىمى ەربولات دوسايەۆ № 7 قالالىق كلينيكالىق اۋرۋحانا جانىنداعى ەمحانا عيماراتىن ارالاپ، عيماراتتىڭ اعىمداعى جاي-كۇيىن جانە مەديسينالىق ينفراقۇرىلىمدى قاراپ شىقتى. 2018 جىلى № 35 قالالىق ەمحانا قايتا قۇرىلىپ، №7 قالالىق كلينيكالىق اۋرۋحاناعا قوسىلعان بولاتىن.
№7 قالالىق كلينيكالىق اۋرۋحانانىڭ ديرەكتورى ماناس رامازانوۆ قالا باسشىسىنا № 7 مكب تەك الماتىدا عانا ەمەس، رەسپۋبليكادا دا ءىرى مەديسينالىق مەكەمە بولىپ تابىلاتىنىن باياندادى. مۇندا تاۋلىك بويى ستاسيوناردا 800-گە جۋىق پاسيەنت ەم الادى، 20-دان استام مەديسينالىق بەيىن بويىنشا كومەك كورسەتىلەدى. نەيروحيرۋرگيالىق كومەك بويىنشا مەديسينالىق مەكەمە قالانىڭ 4 اۋدانىنا كومەك كورسەتەدى، قالانىڭ ينسۋلت توسەكتەرىنىڭ جارتىسى نەمەسە 70-تەن استام توسەك وسى مەكەمەنىڭ ەكى ينسۋلت بولىمشەسىندە ورنالاسقان. №7 مكب جانىنداعى ەمحاناعا ىرگەلەس اۋدانداردىڭ 31 مىڭنان استام تۇرعىنى تىركەلگەن. قازىرگى ۋاقىتتا امبۋلاتوريالىق-ەمحانالىق قىزمەتتىڭ جوسپارلى قۋاتى ءبىر اۋىسىمدا 200 كەلۋشىنى قۇرايدى. كلينيكادا 2 مىڭنان استام قىزمەتكەر جۇمىس ىستەيدى.
قالا اكىمىنە مەديسينالىق مەكەمە عيماراتتارىن ارالاۋ بارىسىندا اعىمداعى جىلدىڭ ناۋرىز ايىندا وتكىزىلگەن قۇرىلىس كونسترۋكسيالارىن تەحنيكالىق تەكسەرۋ قورىتىندىلارى ۇسىنىلدى. قويما بولمەلەرى ورنالاسقان ەمحانانىڭ جەرتولە قاباتىندا ەنى 2-3 سم بولاتىن بارلىق قابىرعالاردا كولدەنەڭ جارىقتار بار، ولاردىڭ ىشىندە دە، سىرتىندا دا – ءبىرىنشى جانە ەكىنشى قاباتتار اراسىندا. عيماراتتىڭ بۇرىشتىق بولىگى شوگىندى بەردى، قۇرىلىمنىڭ تۇتاستىعى بۇزىلدى، بۇل قىزمەتكەرلەر مەن كەلۋشىلەرگە ءقاۋىپ توندىرەدى. قازىرگى ۋاقىتتا ەمحانا عيماراتى "اپاتتى" دەپ باعالاندى.
№7 مكب جانىنداعى ەمحانانى تەكسەرۋ قورىتىندىسى بويىنشا الماتى اكىمى ەربولات دوسايەۆ قوعامدىق دەنساۋلىق ساقتاۋ باسقارماسىنا مەديسينالىق ينفراقۇرىلىمدى ودان ءارى جاڭارتۋ جونىندە ءبىرقاتار ناقتى تاپسىرمالار بەردى. قۇرىلىس باسقارماسىنا ەمحانانى كۇردەلى جوندەۋ، رەكونسترۋكسيالاۋ، مودەرنيزاسيالاۋ جانە كلينيكا ستاسيونارىن زاماناۋي مەديسينالىق جابدىقتارمەن قوسىمشا جاراقتاندىرۋ جانە يننوۆاسيالىق تەحنولوگيالاردى ەنگىزۋ بويىنشا جوبالاۋ-سمەتالىق قۇجاتتامانى ازىرلەۋ تاپسىرىلدى. بۇل جۇمىستار حالىققا زاماناۋي ساپالى مەديسينالىق كومەك كورسەتۋگە مۇمكىندىك بەرەدى.
مەديسينالىق ۇيىم عيماراتىن كۇردەلى جوندەۋ جوباسى جانە ىسكە اسىرۋدى باستاۋ 2024 جىلعا جوسپارلانعان. ايتا كەتەرلىگى، قۇرىلىس-مونتاج جۇمىستارى كەزىندە كلينيكانىڭ قىزمەتىن جالعاستىرا بەرەدى، ياعني پاسيەنتتەرگە مەديسينالىق كومەك تولىق كولەمدە كورسەتىلەتىن بولادى. جالپى مودەرنيزاسيالاۋ حالىققا زاماناۋي ساپالى مەديسينالىق كومەك كورسەتۋدىڭ كولەمىن ۇلعايتۋعا مۇمكىندىك بەرەدى.