استانا قالاسىنداعى «اتىراۋ» كوپىرىندە توتەنشە جاعدايلار مينيسترلىگىنىڭ قاتارداعى قىزمەتكەرلەرىنە: قۇتقارۋشىلار، سۇڭگۋىرلەر، كينولوگتار، ءورت سوندىرۋشىلەر، ۇشقىشتار، پسيحولوگتار، مەديسينا قىزمەتكەرلەرى، اسكەري قىزمەتشىلەر ارنالعان امبەباپ فوتوكورمە وتۋدە.
فوتوكورمە قىركۇيەكتىڭ 29-دا اشىلعان بولاتىن، دەپ حابارلايدى Almaty-akshamy.kz توتەنشە جاعدايلار مينيسترلىگىنىڭ سايتىنا سىلتەمە جاساپ.
ءىس-شاراعا توتەنشە جاعدايلار ءمينيسترى سىرىم ءشارىپحانوۆ، BI Group ديرەكتورلار كەڭەسىنىڭ مۇشەسى، باسقارما ءتوراعاسى اسحات وماروۆ، كورمە باتىرلارى، سونداي-اق ازاماتتىق قورعاۋ ورگاندارىنىڭ قىزمەتكەرلەرى، تۇرعىندار قاتىستى.
سىرىم ءشارىپحانوۆ ءوزىنىڭ قۇتتىقتاۋ سوزىندە وتكىزىلىپ جاتقان فوتوكورمەنىڭ ماڭىزدىلىعىن اتاپ ءوتىپ، يميدجدىك جوبانىڭ ۇيىمداستىرۋشىلارىنا العىسىن ءبىلدىردى: «بۇل جوبا تجم قىزمەتكەرلەرى كۇندەلىكتى ورىندايتىن قيىن جۇمىسىن دارىپتەۋ بولىپ تابىلادى. ءبىزدىڭ قىزمەتكەرلەردىڭ ءارقايسى ءۇشىن ونىڭ باتىرلىعىنا، ەرلىگىنە جانە ەرەن ەڭبەگىنە بەرىلگەن باعا ماڭىزدى».
كورمە «BI GROUP» قازاقستاننىڭ ءىرى يننوۆاسيالىق حولدينگىنىڭ قولداۋىمەن «RIZAMYZ» الەۋمەتتىك جوباسى اياسىندا جىل سايىن اتاپ وتىلەتىن كاسىبي مەرەكە 19 قازان - قۇتقارۋشىلار كۇنى قارساڭىندا ۇيىمداستىرىلۋدا.
جالپى كورمەگە كەلۋشىلەرگە QR كودى بار 112 پورترەت ۇسىنىلاتىن بولادى. ولار دۇلەي ءزىلزالالار، اپاتتار جانە باسقا توتەنشە جاعدايلار كەزىندە ادامدارعا تاۋلىك بويى كومەككە كەلەدى. QR كودتى سكانەرلەۋ ارقىلى فوتوداعى قۇتقارۋشىلار تۋرالى، ولاردىڭ جاساعان ەرلىكتەرى جايلى مالىمەتپەن تانىسۋعا بولادى. بۇل پورترەتتەر - كۇن سايىن وزدەرىنىڭ كۇردەلى، ءبىراق وسىنداي ماڭىزدى قىزمەتىن اتقاراتىن ازاماتتىق قورعاۋ ورگاندارىنىڭ بارلىق 29 مىڭ قىزمەتكەرىنىڭ ۇجىمدىق بەينەسى.
كورمەنىڭ ورتاسىندا فوتوسۋرەتتەر اراسىندا QR كودى بار قارا تاقتايشا ورنالاستىرىلعان. وسى QR كود ارقىلى rizamyz.com سايتىنا ءوتىپ، ءوز ءومىرىن ازاماتتىق قورعاۋ ورگاندارىندا ارناپ، ءوز مىندەتتەرىن اتقارۋ كەزىندە ەرلىكپەن قازا تاپقان 11 قۇتقارۋشىنىڭ ءومىر تاريحىمەن تانىسۋعا بولادى.
كورمە 20 قازانعا دەيىن جالعاساتىن بولادى.