قازاقستاندا اليمەنت تولەمەگەنى ءۇشىن 1 618 ادام ىزدەستىرىلىپ جاتىر. ونىڭ ىشىندە ەرلەردىڭ سانى – 1 476، ال ايەلدەر – 142، دەپ حابارلايدى اlmaty-akshamy.kz.
باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ستاتيستيكالىق دەرەكتەرىنە سايكەس ىزدەۋدە جۇرگەندەردىڭ كوبى 31 جاستان 40 جاسقا دەيىنگىلەر. قالا بويىنشا سانىنا توقتالساق، استانادا – 361، الماتى – 191، اقتوبە – 143، قوستاناي – 140، جامبىل – 140، پاۆلودار – 108، الماتى – 102، ماڭعىستاۋ وبلىسىندا 59 ادامعا ىزدەۋ سالىنعان.
2023 جىلدىڭ 9 ايىندا سدتبت-دا اليمەنت تولەۋ جونىندەگى مىندەتتەردى قاساقانا ورىنداماۋ فاكتىلەرى بويىنشا 427 قىلمىستىق ءىس تىركەلگەن (قىلمىستىق كودەكستىڭ 139-بابى). ايتا كەتسەك، قىلمىستىق كودەكستىڭ 139-بابى بويىنشا التى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋ نە ەكى جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ تۇرىندەگى جازا كوزدەلگەن.
ايماق بويىنشا مۇنداي قىلمىستىق قۇقىق بۇزۋشىلىقتادىڭ ەڭ كوپ بولىگى مىنا وڭىرلەردە: ماڭعىستاۋ – 46، الماتى (و) – 45، قوستاناي – 44،شىعىس قازاقستان – 43،
پاۆلودار – 40، قاراعاندى – 35، اباي – 32، اقمولا – 26،سولتۇستىك قازاقستان-21، استانا (ق) – 17 وبلىستارىندا تىركەلگەن.
وسى كەزەڭدە قىلمىستىق كودەكستىڭ 139-بابى بويىنشا 207 ادام سوتتالدى. 4 ادام باس بوستاندىعىنان ايىرىلدى، 2 ادام شارتتى تۇردە سوتتالدى، 196 ادامنىڭ باس بوستاندىعى شەكتەلدى، 5-ەۋى قوعامدىق جۇمىستارعا تارتىلدى.
جالپى اليمەنت بويىنشا سوت ورىنداۋشىلاردىڭ وندىرىسىندە اليمەنت ءوندىرىپ الۋ تۋرالى 309 670 اتقارۋشىلىق ءىس ورىنداۋدا بولدى. بۇل رەتتە بالالارعا عانا ەمەس، اتا-انالارىن، جۇبايىن (زايىبىن) كۇتىپ-باعۋعا اليمەنت ءوندىرىپ الىنادى.
291 886 اتقارۋشىلىق ءىس - بالالاردى كۇتىپ-باعۋعا ارنالعان اليمەنت بويىنشا؛
773 اتقارۋشىلىق ءىس - ەڭبەككە قابىلەتسىز اتا-انالارىن كۇتىپ-باعۋعا؛
4 506 اتقارۋشىلىق ءىس - ەڭبەككە قابىلەتسىز جۇبايىن (زايىبىن) كۇتىپ-باعۋ وندىرىستەرى بولدى.