فورۋمعا ق ر پرەزيدەنتتىگىنە كانديداتتىڭ 2،5 مىڭعا جۋىق سەنىمدى وكىلى قاتىستى. ولار – «AMANAT»، «اق جول»، قازاقستان حالىق پارتياسى سىندى ساياسي پارتيالاردىڭ جانە حالىقتىق كواليسياعا كىرگەن 30-دان استام رەسپۋبليكالىق قوعامدىق بىرلەستىك مۇشەلەرى.
جاقتاستار فورۋمى – كانديداتتىڭ سايلاۋالدى ناۋقانىنداعى سوڭعى ءىس-شارا. قاسىم-جومارت توقايەۆ فورۋمدا سويلەگەن سوزىندە قولداۋ بىلدىرگەن بارشاعا ريزاشىلىعىن ءبىلدىردى.
«سايلاۋعا دايىندىق جۇمىستارى اياقتالدى. سىزدەر اۋقىمدى جۇمىس اتقاردىڭىزدار. الداعى جەكسەنبىدە حالقىمىز ەلدىڭ بولاشاعىن ايقىندايدى. بۇل – مەملەكەتىمىز ءۇشىن وتە ماڭىزدى ناۋقان. جۇرتىمىز وسى سايلاۋعا ايرىقشا ءمان بەرىپ وتىر. ونىڭ ءوز ەرەكشەلىگى بار. سايلاۋ ناۋقانى ءۇش ايعا جۋىق جۇرگىزىلدى. قوعام وكىلدەرى قىزۋ پىكىرتالاسقا ءتۇستى. ءارتۇرلى تالقىلاۋ بولدى. سونىڭ بارىسىندا يگى باستامالار جانە تىڭ ۇسىنىستار ايتىلدى»، - دەدى قاسىم-جومارت توقايەۆ.
ءىس-شارا بارىسىندا رەسپۋبليكالىق قوعامدىق شتابتىڭ باسشىسى ەرلان قوشانوۆ، «تەڭ مۇمكىندىكتەر الەمى» قوعامدىق قورىنىڭ نەگىزىن قالاۋشى نۇرگۇل ۇلجەكوۆا، زاۋىت شەبەرى ماقسات توحانوۆ، كارديولوگ-دارىگەر گۇلنار قامباروۆا، «Sensitive» ەستىمەيتىن بيشىلەر تەاترىنىڭ ءسوليسى اينۇر ساينوۆا، قوستاناي وبلىسىنان كەلگەن ۆولونتەر يۋريي پرەسنوۆ جانە «ۇلتتىق رۋح» قوعامدىق بىرلەستىگىنىڭ ءتوراعاسى ايات سۇگىرباي ءسوز سويلەدى.
جالپى، ۇگىت-ناسيحات ناۋقانى كەزىندە قاسىم-جومارت توقايەۆتىڭ جاقتاستارى 42 قالا مەن 5000-نان استام اۋىلدى ارالادى. ولار وتكىزگەن 24 مىڭ ۇگىت-ناسيحات ءىس-شاراسىنا 3 ميلليونعا جۋىق سايلاۋشى قاتىستى. كەزدەسۋلەر بارىسىندا ازاماتتاردان 40 مىڭنان استام ۇسىنىس پەن تىلەك جينالدى.