ەلوردادا جىل سوڭىنا دەيىن 60 مىڭ جۇمىس ورنى قۇرىلادى. بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە ەلوردا اكىمى جەڭىس قاسىمبەك ايتتى، دەپ حابارلايدى اlmaty-akshamy.kz.
«بيىلعى ءۇش ايدىڭ قورىتىندىسىنا سايكەس، استانا قالاسىنىڭ بارلىق نەگىزگى الەۋمەتتىك-ەكونوميكالىق كورسەتكىشتەرى بويىنشا وڭ سەرپىن كورسەتىپ وتىر. جالپى، ءۇش ايدا ينۆەستيسيا كولەمى 204 ملرد تەڭگەنى قۇراپ، 29 پايىزعا ءوستى. ونىڭ ىشىندە نەگىزگى كاپيتالعا سالىنعان جەكە ينۆەستيسيالاردىڭ ۇلەسى شامامەن 79 پايىزدى قۇرايدى. قۇرىلىس جۇمىستارىنىڭ كولەمى 9،5 پايىزعا ۇلعايدى. جۇمىسسىزدىق 4،5 پايىزدى قۇرايدى. بۇل رەسپۋبليكالىق دەڭگەيدەن 0،4 پايىزعا تومەن»، – دەدى قالا باسشىسى.
ونىڭ اتاپ وتۋىنشە، قالا تۇرعىندارى سانىنىڭ جوعارى ءوسۋ قارقىنىن ەسكەرە وتىرىپ، جاڭا جۇمىس ورىندارىن قۇرۋ بويىنشا جۇيەلى ءىس-شارالار قابىلداۋ ماسەلەسى وزەكتى بولىپ وتىر. بۇل رەتتە پرەزيدەنتتىڭ وسى جىلدىڭ قاڭتار ايىندا بەرگەن تاپسىرماسىنا سايكەس، تۇراقسىز جۇمىسپەن قامتىلعان ادامداردى انىقتاۋ جانە ەسەپكە الۋ جۇمىسى جۇرگىزىلىپ جاتىر.
«سونداي-اق جەكە اتاۋلى قولداۋ ءىس-شارالارىن ۇسىنىپ، ودان ءارى جۇمىسقا ورنالاسۋعا جاردەمدەسۋ ارقىلى سۇرانىسقا يە ماماندىقتار بويىنشا تەگىن قىسقا مەرزىمدى وقىتۋ جۇرگىزۋدەمىز. جىل سوڭىنا دەيىن بيزنەسپەن بىرلەسىپ، 60 مىڭنان استام جاڭا جۇمىس ورنىن قۇرۋدى جوسپارلاپ وتىرمىز. نەگىزگى جۇمىس ورىندارى شاعىن جانە ورتا بيزنەس سالاسىندا قۇرىلادى. شاعىن جانە ورتا بيزنەس سالاسىندا ەلوردانىڭ ەكونوميكالىق بەلسەندى تۇرعىندارىنىڭ 70 پايىزى جۇمىس ىستەيدى. قازىرگى كۇنى قالادا 154 ينۆەستيسيالىق جوبانىڭ پۋلى قۇرىلدى. بيىل 25 كاسىپورىن ىسكە قوسىلادى. جىل سوڭىنا دەيىن بارلىعى 1 ترلن 300 ملرد تەڭگە ينۆەستيسيا تارتۋدى جوسپارلاپ وتىرمىز»، – دەدى جەڭىس قاسىمبەك.