بۇگىن الماتى قالاسى د.ا.قونايەۆ اتىنداعى كوللەدجدە قۇقىقتانۋ ماماندىعىنىڭ 2 كۋرسى 1-توپ ستۋدەنتتەرىنىڭ ۇيىمداستىرۋىمەن «ەلىمنىڭ باقىتىن تەربەگەن تاۋەلسىزدىك» تاقىرىبىندا مەرەكەلىك ءىس-شارا وتكىزىلدى.
16 جەلتوقسان – قازاقستان رەسپۋبليكاسىنىڭ تاۋەلسىزدىك كۇنى! بۇل كۇن – حالقىمىزدىڭ عاسىرلار بويى اڭساعان ارمانىنىڭ ورىندالعان كۇنى، ەركىندىك پەن بوستاندىققا قول جەتكىزگەن كۇنى! تاۋەلسىزدىك كۇنى – ەلىمىزدىڭ بارلىق ازاماتتارى ءۇشىن ورنى ەرەكشە مەرەكە دەپ بىلەمىز، سەبەبى، وسىناۋ جۇرەكجاردى قۋانىشقا تولى كۇندى اتا-بابالارىمىز عاسىرلار بويى ارمانداپ، كۇتۋمەن وتكەنى بارىمىزگە ءمالىم. ال 1986 جىلعى «جەلتوقسان» وقيعاسى حالىقتىڭ ەسىندە ماڭگى ساقتالادى. 16 جەلتوقساندا قازاق جاستارى ورتالىق الاڭعا شىعىپ، قازاقستاننىڭ تاۋەلسىزدىگىن تالاپ ەتۋدىڭ ناتيجەسىندە 1991 جىلى 16 جەلتوقساندا قازاقستان رەسپۋبليكسىنىڭ تاۋەلسىزدىگى تۋرالى زاڭنىڭ قابىلدانعانى ايتىلدى.
مەرەكەلىك شارا مەملەكەتتىك انۇرانىمەن باستالىپ، جەلتوقسان قۇرباندارىن 1 مينۋت ۇنسىزدىكپەن ەسكە الىپ، قۇرمەت كورسەتىلدى. شاراعا قاتىسقان ستۋدەنتتەر قازاق ەلىنىڭ تاريحى مەن قالىپتاسۋ كەزەڭدەرى، ۇلت-ازاتتىق كوتەرىلىستەر مەن ونىڭ زاردابى، حالقىمىزدىڭ تاۋەلسىزدىك جولىنداعى كۇرەستەرى مەن قول جەتكىزگەن جەتىستىكتەرى تۋرالى مالىمەتتەر الدى. تاۋەلسىزدىگىمىز جولىندا 1986 جىلى 16 جەلتوقساندا ورتالىق الاڭعا شىققان قازاق جاستارىنىڭ اراسىندا بولعان، بۇگىنگى كۇنى ورتامىزدا جۇرگەن قايسار رۋحتى قازاقتىڭ كەشەگى ورىمدەي قىز-جىگىتتەرى بۇگىندە قۇرمەتتى ۇستازدار قاتارىندا قىزمەت اتقارىپ ءجۇر. اتالعان شاراعا كوللەدج ۇستازدارىن قاتىستىرۋ – شاكىرتتەرىنە وتانعا دەگەن سۇيىسپەنشىلىك، ءوز ەلىنىڭ تاريحى مەن تاعدىرىنا قاتىستى سەزىمىن وياتىپ، جاستاردىڭ ازاماتتىق جانە پاتريوتتىق ساناسىن قالىپتاستىرۋدى، ۇستازعا دەگەن قۇرمەتىن ارتتىرۋ ماقساتىندا جوسپارلانعان.
جەلتوقسان وقيعاسىنا قاتىسۋشىلار – كوللەدج ديرەكتورى ر.چ. بۋلەكبايەۆا، زاڭگەر-ۇستاز ا.ن. جۇماباي جانە تاجىريبەلى ۇستاز، تاريح ءپانىنىڭ اعا وقىتۋشىسى ج.ب. اكيمبايەۆا بۇل شاراعا ارنايى شاقىرىلدى. جانىن مۇزداتقان ايازدى كۇندەردىڭ اسەرلى ەستەلىكتەرىمەن بولىسكەن ۇستازدار جانارىنا جاس الىپ كوڭىلدەرى تولقىدى. شاكىرتتەرىن ءبىلىم بەرۋمەن قاتار پاتريوتتىق رۋحتا تاربيەلەي وتىرىپ، جاستارعا جىگەر بەرەتىن تىلەكتەرىن ايتتى.
شارانى ۇيىمداستىرۋ بارىسىندا جاريالانعان بايقاۋلاردىڭ ناتيجەلەرى ايتىلىپ، ۇزدىك دەپ تانىلعان ستۋدەنتتەر «ماداقتاما»،«العىس حاتتارمەن» ماراپاتتالدى. سۋرەتتەر مەن قولونەر بۇيىمدارىنان كورمە ۇيىمداستىرىلىپ، پاتريوتتىق اندەر مەن مانەرلەپ وقۋ جەڭىمپازدارى انىقتالىپ، ونەرلەرىن كورەرمەندەرگە تارتۋ ەتتى. قازاقستاننىڭ تاۋەلسىزدىگىنە جاستاردىڭ جاۋاپكەرشىلىك سەزىمىن قالىپتاستىرۋعا باعىتتالعان تاربيەلىك شارالار ۇلتتىق مادەنيەتتى، تاريحتى جانە باتىرلار ەرلىگىن قادىرلەي وتىرىپ، ەلىنىڭ بولاشاعى ءۇشىن بەلسەندى، ادال ازاماتتار بولىپ وسەتىنىنە سەنىمدىمىز.