XII-ءشى «باستاۋ» كينوفەستيۆالىنىڭ جەڭىمپازداردى انىقتالدى
14 جەلتوقساندا الماتىدا XII حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى ءوز مارەسىنە جەتتى، دەپ حابارلايدى aqshamnews.kz.
ۇلتتىق كينونى قولداۋ ورتالىعى باسپا ءسوز قىزمەتىنىڭ حابارلاۋىنشا، شارانىڭ جابىلۋ سالتاناتى AlmaU-داعى Atrium Grand Hall زالىندا ءوتتى، وندا BASTAU SHORTS بايقاۋ باعدارلاماسىنىڭ جەڭىمپازدارى انىقتالدى.
ۇزدىك قىسقامەتراجدى فيلم نوميناسياسىندا باس سىيلىقتى پولشالىق رەجيسسەر دومينيك ميرەسكييدىڭ «Son of Happiness» كارتيناسى جەڭىپ الدى. ەڭ ۇزدىك انيماسيالىق تۋىندى بولىپ ۋكراينالىق «ءوبىرۋچ» ءفيلمى اتاندى. ال دەرەكتى فيلمدەر سەكسياسىندا باس جۇلدەنى وتاندىق «Menin Terminatorsham» كارتيناسى ۇتتى. سونىمەن بىرگە قازىلار القاسى سلوۆاكيادان كەلگەن «كاسىبي اتا-انا» اتتى تۋىندىنى ەرەكشە اتاپ ءوتتى.
«كينودا ەڭ قيىنى – ول باستاۋ. سول سەبەپتى ءبىزدىڭ باستى ماقساتىمىز وسى دارىندى جاستاردىڭ العاشقى قادامىندا قولداۋ كورسەتۋ، دامىتۋ، ولاردى تانىتۋ. ول ۇلكەن جۇمىس. ۇيىمداستىرۋ قيىنشىلىقتارىنا، قاراجاتتىڭ جوقتىعىنا قاراماستان ءبىز بيىل فەستيۆالدى ءوزىمىز وتكىزدىك. بۇكىل سەرىكتەستەر مەن قولداۋشىلارعا مىڭ العىس»، - دەپ اتاپ ءوتتى «باستاۋ» پرەزيدەنتى سەرگەي ءازىموۆ.
ءداستۇرلى تۇردە فەستيۆالدە ستۋدەنتتىك قازىلار القاسى جۇمىس ىستەدى، ولار دا ءوز جەڭىمپازدارىن تاڭدادى. جاستاردىڭ تاڭداۋى پولشادان كەلگەن تاعى ءبىر كارتينا - الەكساندر پاكۋلسكييدىڭ Hi grandpa ءفيلمى. ستۋدەنتتەر سونىمەن قاتار دەبيۋتانت ماحامبەت مىرزانىڭ «قاراشا» اتتى تۋىندىسىن دا ەرەكشە اتاپ ءوتتى.
«بۇل مەنىڭ دەبيۋتتىك جۇمىسىم. ءبىرىنشى كۋرستا تۇسىرگەم. ءقازىر ونەر اكادەمياسىندا ەكىنشى كۋرستا وقيمىن. بۇل مەنىڭ ءۇشىنشى فەستيۆالىم. ماسكەۋدە، جانە كۇنى كەشە تۇركيادا بولدىم. ءبىراق العاشقى جۇلدەمدى قازاقستاندا الىپ وتىرمىن. بۇل مەن ءۇشىن ۇلكەن مارتەبە. مەنىڭ ءفيلمىم – اۋىلدا ادال ەڭبەكپەن ءومىر سۇرەتىن اتا مەن اجە تۋرالى». – دەيدى دەبيۋتانت، تانىمال تيكتوكەر ماحامبەت مىرزا.
سونىمەن قاتار، تۇركيانىڭ «Vaziyet» اتتى تۋىندىسى نەتپاك – ازيا كينوسىن ىلگەرىلەتۋ جونىندەگى دۇنيەجۇزىلىك ۇيىمنىڭ جۇلدەسىن جەڭىپ الدى. ال فەستيۆال پرەزيدەنتىنىڭ «جارقىن دەبيۋت» ءۇشىن ارنايى جۇلدەسىمەن وتاندىق رەجيسسەر الينا مۇستافينا «ونىڭ اكەسىنە، مەنىڭ ارعى اتاما، ونىڭ ارعى اتاسىنا پىراندىك» دەرەكتى ءفيلمى ءۇشىن ماراپاتتالدى.
سونداي-اق، سالتاناتتى راسىمدە رەجيسسەرلەرگە ارنالعان Almaty Film Lab شەبەرحاناسىنىڭ ەكىنشى پيچينگ جەڭىمپازدارىنىڭ ەسىمدەرى بەلگىلى بولدى. ولار ءوز جوبالارىن ودان ءارى ءوندىرۋ ءۇشىن قارجىلىق قولداۋ الادى. جەڭىپمازداردىڭ قاتارىنا «اياۋلىم» جوباسىمەن ميرا ابدراحمانوۆا جانە «تويىمسىز ادامدار» تۋىندىسىمەن داستان تۇسىپبەكوۆ قوسىلدى.
سالتاناتتى شارا بىلتىرعى پيچينگ جەڭىمپازدارىنىڭ ءۇش قىسقامەتراجدى ءفيلمىن كورسەتىلىمىمەن اياقتالدى.
ەستەرىڭىزگە سالا كەتسەك، بيىل كونكۋرستىق باعدارلاماعا 500-دەن استام ءوتىنىم كەلىپ ءتۇستى، ولاردىڭ ىشىنەن 28 ەلدىڭ 43 كارتيناسى ىرىكتەلدى. سونداي-اق، فەستيۆالدءىڭ اشىلۋ سالتاناتىندا وتاندىق كينويندۋستريانىڭ دامۋىنا قوسقان ۇلەسى ءۇشىن اقساقالدارىمىز ءاسانالى ءاشىموۆ، راحمان ءالشانوۆ جانە قانات ابىشيەۆكە ەرەكشە سىيلىقتار تابىستالدى. فەستيۆالدى ءداستۇرلى تۇردە الماتى قالاسى اكىمدىگىنىڭ قولداۋىمەن Tanaris Production جانە A-Team كينوكومپانيالارى ۇيىمداستىردى.