«اۋەزوۆ ءۇيى» عىلىمي-مادەني ورتالىعىنىڭ ءماجىلىس زالىندا م.و.اۋەزوۆ اتىنداعى ادەبيەت جانە ونەر ينستيتۋتى، ۇلتتىق ماناس اكادەمياسى، حالىقارالىق «تۇركسوي» ۇيىمىنىڭ ۇيىمداستىرۋىمەن ۇلى ماناسشى ساياقباي قارالايەۆتىڭ 130 جىلدىق مەرەيتويىنا ارنالعان حالىقارالىق عىلىمي-تاجىريبەلىك كونفەرەنسياسى مەن قازاق حالقىنىڭ ۇلى جازۋشىسى مۇحتار اۋەزوۆ جانە مۇرات اۋەزوۆتى ەسكە الۋ كەشى ءوتتى.
ءىس-شارانىڭ باستى ماقساتى – مۇحتار اۋەزوۆتىڭ جانە ساياقباي قارالايەۆتىڭ قىرعىزدىڭ «ماناس» ەپوسىن ساقتاۋعا جانە جان-جاقتى تانىتۋعا قوسقان ۇلەسىن ايقىنداۋ.
كونفەرەنسيا اياسىندا قازاق جانە قىرعىز ادەبي مۇرالارىنىڭ ەرەكشەلىگى تالدانىپ، ۇلتتىق ەپوستى ساقتاۋ جانە ناسيحاتتاۋ باعىتىندا وزەكتى ماسەلەلەر تالقىلاندى.
– بۇل ءىس-شارانىڭ ماڭىزى زور. ادەبيەت مەن مادەنيەتكە ەڭبەك سىڭىرگەن ايىرىقشا تۇلعالار از بولماعان. عىلىممەن شۇعىلدانۋ، رۋحاني جادىگەرلەردى وي ەلەگىنەن وتكىزىپ حالىققا ۇسىنۋ ۇلكەن قاجىر-قايراتتى قاجەت ەتەدى. عالىمنىڭ جازعان ەڭبەگى ۇرپاقتان-ۇرپاققا ماڭگىلىك مۇرا بولىپ قالا بەرەدى، – دەدى ق ر ۇعا اكادەميگى، فولكلورتانۋشى عالىم كەنجەحان ءىسلامجان ۇلى.