ەلىمىزگە ترانسشەكارالىق وزەندەر ارقىلى كەلەتىن سۋدىڭ كولەمى جىل سايىن ازايىپ كەلەدى

پرەزيدەنت ءوز جولداۋىندا سۋدى ۇنەمدى پايدالاناتىن كەز كەلگەنىن ايتتى.

ۇكىمەتكە سۋ كەڭەسىنىڭ جۇمىسىن جانداندىرۋدى تاپسىردى. جاڭا رەفورمادا ايتىلعان ۇسىنىستاردى سالا ماماندارى دا قۇپتاپ، وڭ وزگەرىستەر كۇتىپ وتىر، دەپ حابارلايدى Almaty-akshamy.kz.

ەلىمىزدەگى ۇلكەن وزەندەردىڭ 80 پايىزى – ترانسشەكارالىق. سوندىقتان سۋ ساياساتىنا كەلگەندە، كورشى ەلدەرگە تاۋەلدىمىز. مەملەكەتارالىق كەلىسىمدەر بولعانىمەن، ماۋسىمدىق كەزەڭدەردە ديقاندار سۋ تاپشىلىعىن سەزىنىپ كەلەدى. سونىڭ وزىندە ىسىراپشىلدىق كوپ. ماسەلەن، سىرداريادان ەگىستىكتەر مەن شابىندىق جەرلەرگە تارايتىن ارنالاردىڭ كوبى بىتەلىپ، گيدروقۇرىلعىلاردىڭ توزىعى جەتكەن. ماماندار سۋدى ۇنەمدى پايدالانۋ ءۇشىن كەڭەس داۋىرىندەگى توسپالار مەن گيدرونىسانداردى قايتا جاڭعىرتىپ، اۆتوماتتاندىرۋ تەحنولوگياسىن ەنگىزۋ قاجەت دەپ ەسەپتەيدى.

«پرەزيدەنتىمىز جولداۋىندا جاقسى ايتىپ كەتتى. ەندى رەسپۋبليكا كولەمىندە دە ۇلكەن گيدروتەحنيكالىق نىساندار مەن ۇلكەن كانالدارعا قارجى بولىنەدى دەگەن سەنىمدەمىز. سونى ءبىز جوندەپ، جاڭا تەحنولوگيالار ەنگىزىپ، اۆتوماتيزاسيا ەنگىزۋ ارقىلى ءبىز ونى از سۋدى ۇقىپتى پايدالانامىز با دەگەن ۇلكەن ءۇمىتىمىز بار»، - دەيدى «قازسۋشار» رمك وندىرىستىك ۋچاسكە باسشىسى جورابەك نۇرىمبەتوۆ.