باس پروكۋراتۋرا قاڭتار وقيعاسى بويىنشا راقىمشىلىققا ىلىگەتىندەردىڭ ءتىزىمىن جاساپ جاتىر

مىڭنان استام ءىس تەرگەلىپ، مىڭعا تارتا ادام سوتتالعان.

باس پروكۋروردىڭ ورىنباسارى اسەت شىندالييەۆ قاڭتار وقيعاسى بويىنشا پرەزيدەنت جاريالاعان ءبىر رەتتىك راقىمشىلىققا كىمدەر ىلىكپەيتىنىن ايتتى، دەپ حابارلايدى Almaty-akshamy.kz.

«ازىرگە ناقتى سانىن ايتا المايمىن. ويتكەنى ءقازىر پىسىقتاپ جاتىرمىز. پرەزيدەنت تاپسىرما بەردى، ەندى قاراستىرۋ كەرەك. ەكسترەميستىك قىلمىس جاساعاندار، قاڭتار وقيعاسىن ۇيىمداستىرعاندار راقىمشىلىققا ىلىكپەيدى»، - دەدى شىندالييەۆ ءماجىلىس كۋلۋارىندا.

ايتۋىنشا، مىڭنان استام ءىس تەرگەلىپ، مىڭعا تارتا ادام سوتتالعان.

«وسى ستاتيستيكانى نازارعا الۋ كەرەك. ازىرگە قانشا ادامعا امنيستيا جاريالاناتىنىن ايتۋعا دايىن ەمەسپىن. ەكسترەميستەردىڭ جالپى سانى ەسىمدە جوق، ويتكەنى ءىس وتە كوپ»، - دەدى باس پروكۋروردىڭ ورىنباسارى.

ول راقىمشىلىققا ىلىگەتىن ادامداردىڭ سانى كەيىن حابارلاناتىنىن جەتكىزدى.

«ءبىز تەرگەۋ كەزىندە دە ىزگىلىك تانىتتىق. ەستەرىڭىزدە بولسا، پرەزيدەنت قاڭتار وقيعاسىنان كەيىن جەڭىل قىلمىسقا بارعانداردى باس بوستاندىعىنان ايىرماۋدى تاپسىرعان ەدى. قاتەلەسپەسەم، 983 ادام سوتتالدى، ونىڭ ىشىندە 100-دەن استامى ناقتى جازاعا كەسىلسە، قالعاندارى شارتتى تۇردە جانە باس بوستاندىعى شەكتەلدى»، - دەدى شىندالييەۆ.

ول جاپپاي تارتىپسىزدىكتەر كەزىندە قازا تاپقاندار سانى وزگەرمەگەنىن اتاپ ءوتتى.