26 ناۋرىزعا دەيىن قوعامدىق تالقىلاۋعا ۇسىنىلعان.
اۋىل شارۋاشىلىعى مينيسترلىگى «قازاقستان اۋماعىنا بيدايدى اۆتوموبيل، سۋ جانە تەمىرجول كولىگىمەن اكەلۋگە تىيىم سالۋدى ەنگىزۋ تۋرالى» بۇيرىق جوباسىن دايىندادى، دەپ حابارلايدى Almaty-akshamy.kz
جوبا قازاقستانعا ءۇشىنشى ەلدەردەن جانە ەۋرازيالىق ەكونوميكالىق وداق ەلدەرىنەن اۆتوموبيل، سۋ جانە تەمىرجول كولىگىمەن بيداي يمپورتىنا 6 اي مەرزىمگە تىيىم سالۋدى كوزدەيدى. الايدا بيدايدى تەمىر جول ارقىلى قۇس جانە ۇن فابريكالارىنا تەك ءوندىرۋ جانە تۇتىنۋ ءۇشىن اكەلۋگە رۇقسات ەتىلەدى. بۇل رەتتە قۇس جانە ۇن تارتۋ كاسىپورىندارىنا اكەلىنگەن بيداي ىشكى جانە سىرتقى نارىقتا ساتىلىمعا جاتپايدى.
سونداي-اق تىيىم سالۋ قازاقستان اۋماعىنان تىس جەردە باستالاتىن جانە اياقتالاتىن تەمىرجول ترانزيتتىك تاسىمالى اياسىندا قازاقستانعا اكەلىنەتىن بيدايعا قولدانىلمايدى.
تۇسىندىرمە حاتتا 12 ناۋرىزدا سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ جونىندەگى ۆەدومستۆوارالىق كوميسسيانىڭ وتىرىسى ءوتىپ، ونىڭ بارىسىندا اتالعان كولىك تۇرلەرىمەن بيداي يمپورتىنا تىيىم سالۋدى ەنگىزۋ تۋرالى شەشىم قابىلدانعانى ايتىلعان.
ازىرلەۋشىلەر ىشكى قازاقستاندىق نارىقتا ازىق-تۇلىك پەن جەمدىك استىقتىڭ جەتكىلىكتى قورى بار دەپ تۇسىندىرەدى. ماسەلەن، 2023 جىلى 12،1 ملن توننا بيداي جينالدى. وڭدەۋ جانە ەكسپورتقا جونەلتۋ كولەمدەرىن ەسكەرە وتىرىپ، اعىمداعى جىلدىڭ 1 ناۋرىزىنداعى جاعداي بويىنشا استىق قورى 11،5 ملن توننانى قۇرايدى. سونىمەن قاتار ازىق-تۇلىك كورپوراسياسى 350 مىڭ توننا جەمدىك استىقتى تىكەلەي ساتىپ الۋدى جۇزەگە اسىردى، – دەلىنگەن حابارلامادا.
بۇل رەتتە قازاقستان رەسەيدەن قوسىمشا استىق الادى، بۇل ىشكى نارىقتا سۇرانىستىڭ تومەندەۋىنە جانە باعانىڭ تومەندەۋىنە اكەلىپ سوعادى. ماسەلەن، قتج مالىمەتىنشە، بيىل قاڭتار ايىندا رەسەي فەدەراسياسىنان تەمىرجول ارقىلى 174 مىڭ توننا بيداي يمپورتتالعان، بۇل 2022 جىلعى دەڭگەيدەن (127،8 مىڭ توننا) 35 پايىزعا ارتىق. جازعى ناۆيگاسيا كەزەڭىندە سۋ كولىگىمەن 29 مىڭ توننا بيداي يمپورتتالدى، بۇل ىشكى نارىقتاعى رەسەيلىك بيداي كولەمىن ارتتىرادى.
يمپورتتىڭ ارتۋى ساپاسىز بيدايدى وتكىزۋ ماسەلەسىن ودان ءارى قيىنداتادى. استىق وتكىزۋ نارىعىنىڭ بولماۋى وتاندىق اۋىل شارۋاشىلىعى تاۋارىن وندىرۋشىلەردىڭ قارجىلىق جاعدايىنىڭ ناشارلاۋىنا الىپ كەلەدى، بۇل 2024 جىلعى ەگىس ناۋقانىنىڭ ۇزىلۋىنە اكەلۋى مۇمكىن.