ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا ءتۋريزمدى ودان ءارى دامىتۋ شارالارى تالقىلاندى.
ۇكىمەت وتىرىسىندا سالانىڭ ءتيىمدى دامۋىنا كەدەرگى كەلتىرەتىن فاكتورلار اتالدى. ولار – ينفراقۇرىلىمنىڭ جەتىسپەۋى، شەكتەۋلى جاتىن ورىندارى، لوگيستيكا مەن كورسەتىلەتىن قىزمەتتەر ساپاسىنىڭ تومەن دەڭگەيى، دەپ حابارلايدى Almaty-akshamy.kz.
«تۋريستەردىڭ شاعىمدارى مەن ۇسىنىستارىنا بىردەن نازار اۋدارۋ كەرەك. مىسالى، بيىل تۋريستەر الاكول كۋرورتتىق ايماعىندا ەلەكتر ەنەرگياسىنىڭ ءجيى ءوشىپ قالاتىنىنا شاعىمداندى. تۋريستەر سانىن ارتتىرۋ ءۇشىن ينفراقۇرىلىمدى بەلسەندى دامىتۋ قاجەت. اتالعان ماسەلەلەردى شەشۋ ءاربىر اكىمنىڭ مىندەتى بولۋعا ءتيىس»، — دەدى ءاليحان سمايىلوۆ.
پرەمەر-مينيستردىڭ پىكىرىنشە، بۇگىندە ەلىمىزدىڭ بۇكىل تۋريستىك الەۋەتىن پايدالانۋ وزەكتى كۇيىندە قالىپ وتىر. اتاپ ايتقاندا، باياناۋىل كۋرورتتىق ايماعىندا ءتۋريزمدى دامىتۋ تەك جاسىباي كولىمەن شەكتەلگەن. وڭىردەگى باسقا دا كولدەردىڭ، تاۋلار مەن مادەني ەسكەرتكىشتەردىڭ مۇمكىندىكتەرى نازاردان تىس قالعان.
«وتكەن جازعى ماۋسىمدا اسسى ءۇستىرتى مەن قاپشاعاي ايماعىنا تۋرلاردى ۇيىمداستىرۋ كەزىندە قىزمەتتەردىڭ ساپاسىنا كوپتەگەن شاعىمدار ءتۇستى. تاكسي، تاماقتانۋ جانە قوناق ءۇي قىزمەتتەرى باعالارىنىڭ شارىقتاپ كەتۋىنە قاتىستى شاعىمدار ءجيى ايتىلادى. مۇنداي ورىنسىز جاعدايلار ەلدىڭ تۋريستىك تارتىمدىلىعىن تومەندەتەدى»، — دەدى ول.
ءاليحان سمايىلوۆ اتاپ وتكەندەي، قوناق ۇيلەردى كلاسسيفيكاسيالاۋ جۇيەسىن رەفورمالاۋ جانە ستاندارتتاردى حالىقارالىق دەڭگەيگە دەيىن كوتەرۋ جۇمىستارىن باستاۋ قاجەت. وسىعان بايلانىستى تۋريزم جانە سپورت مينيسترلىگىنە ساۋدا جانە ينتەگراسيا مينيسترلىگىمەن بىرلەسىپ، تۋريزم سالاسىنداعى وبەكتىلەر مەن كورسەتىلەتىن قىزمەتتەرگە الەمدىك ستاندارتتارعا سايكەستىگى تۇرعىسىنان تەكسەرۋ جۇرگىزۋ جونىندە شارالار قابىلداۋدى تاپسىردى.
پرەمەر-مينيستر سونداي-اق توپ-20 تۋريستىك اۋماقتاردى دامىتۋ جونىندەگى جول كارتالارىن بەكىتۋ قاجەتتىگىن ايتتى.
«جەرگىلىكتى تاريحي ەسكەرتكىشتەر، كوركەم تابيعي پەيزاجدار مەن حالقىمىزدىڭ باسقا دا يگىلىكتەرى تۇگەلدەي تۋريستىك ونىمدەرگە دۇرىس ينتەگراسيالانۋى قاجەت»، — دەدى ول.
سونىمەن قاتار، ۇكىمەت باسشىسى مادەني، اگرو جانە ەكوتۋريزمدى دامىتۋ بويىنشا ناقتى تاسىلدەردى ازىرلەۋدى تاپسىردى.
قورىتىندىلاي كەلە، ءاليحان سمايىلوۆ تۋريستىك نىسانداردى قاجەتتى ينفراقۇرىلىممەن قامتاماسىز ەتۋ، تۋريستەردىڭ قاۋىپسىزدىگىن ارتتىرۋعا باعىتتالعان شارالاردى قابىلداۋ، قازاقستاننىڭ شەتەلدەگى تۋريستىك الەۋەتى تۋرالى بەلسەندى اقپاراتتىق ناۋقان جۇرگىزۋدى قامتاماسىز ەتۋ، سونداي-اق تۋريزم سالاسىن سيفرلاندىرۋ جانە قىزمەت كورسەتۋ ساپاسىن ارتتىرۋ جونىندەگى ءىس-شارالار جوسپارىن بەكىتۋ قاجەتتىگىن اتاپ ءوتتى.
«بۇل رەتتە، شەتەلدىك ءتۋريستىڭ ەل اۋماعىنا كەلگەننەن باستاپ، كەتۋىنە دەيىنگى بارلىق كەزەڭىن سيفرلاندىرۋدىڭ جانە وڭايلاتۋدىڭ تولىق سيكلىن، سونداي-اق ىشكى تۋريزمگە ارنالعان قىزمەتتەردىڭ بارلىق سپەكترىن قامتۋ ماڭىزدى»، — دەپ تۇيىندەدى ءسوزىن ۇكىمەت باسشىسى.