ۇكىمەت باسشىسى وقۋ-اعارتۋ مينيسترلىگىنە وسى ماسەلەنى پىسىقتاۋدى تاپسىردى.
ۇكىمەت باسشىسى وقۋ-اعارتۋ مينيسترلىگى وقۋ باعدارلامالارى اياسىندا قارجىلىق ساۋاتتىلىق كۋرستارىن ەنگىزۋ ماسەلەسىن پىسىقتاۋى كەرەكتىگى، عىلىم جانە جوعارى ءبىلىم مينيسترلىگى بۇل ماسەلەلەردى جوعارى وقۋ ورىندارىمەن بىرگە قاراۋى ءتيىس ەكەنىن ايتتى، دەپ حابارلايدى Almaty-akshamy.kz
"كامەلەتكە تولعان جاستار وزدەرىنىڭ قارجىلىق مۇمكىندىكتەرىن قالاي دۇرىس ەسەپتەۋ كەرەكتىگىن، كرەديتتى قالاي جانە قانداي كرەديت الۋ كەرەكتىگىن ناقتى ءتۇسىنۋى كەرەك. مۇنداي تاجىريبە كوپتەگەن ەلدە بار"، — دەدى ءاليحان سمايىلوۆ.
سونداي-اق ۇكىمەت باسشىسىنىڭ ايتۋىنشا، حالىقتىڭ شامادان تىس كرەديت الۋ پروبلەماسىن شەشۋ قۇرالدارىنىڭ ءبىرى – ازاماتتاردىڭ تولەم قابىلەتتىلىگىن قالپىنا كەلتىرۋ جانە بانكروتتىعى ينستيتۋتى بولىپ تابىلادى. سونىمەن بىرگە بورىشكەرلەردىڭ بارىندە بىردەي بانكروتتىق ءراسىمىن پايدالانۋ مۇمكىندىگى جوق.
پروبلەمالىق قارىز الۋشىلاردى كوبىرەك قامتۋ ءۇشىن قارجى مينيسترلىگى وسى جىلدىڭ سوڭىنا دەيىن قۇجاتتار بەرۋدى وڭايلاتۋ جانە سوتتان تىس بانكروتتىقتى قولدانۋ ءراسىمىن جەتىلدىرۋ جونىندە شارالار قابىلداۋى قاجەت.
"ءبىراق ادامداردا "بانكروت بولساق، قارىزدى جابا سالادى ەكەن" دەگەن قاتە تۇسىنىك بولماۋى ءتيىس. بۇل – ۇلكەن جاۋاپكەرشىلىگى مەن بەلگىلى ءبىر شەكتەۋلەرى بار ماڭىزدى قادام"، — دەدى پرەمەر-مينيستر.
وعان قوسا ۇكىمەت باسشىسى بۇگىنگى تاڭدا بانك سالاسىنداعى ينتەرنەت-الاياقتىق وزەكتى ماسەلەگە اينالعانىن ايتتى. جالپى سوڭعى جىلدارى مۇنداي فاكتىلەردىڭ سانى 5 ەسەگە دەيىن كوبەيىپ كەتكەن.
"وسى جىلدىڭ باسىنان بەرى ينتەرنەت-الاياقتىققا بايلانىستى 15 مىڭنان استام قىلمىستىق ءىس تىركەلدى. كەلتىرىلگەن زياننىڭ مولشەرى 13 ملرد تەڭگەنى قۇرادى. ونىڭ 65%-ىن شەتەلدەن كەلگەن الاياقتار جاساعان. ءىىم مۇددەلى مەملەكەتتىك ورگاندارمەن جانە ءموبيلدى بايلانىس كومپانيالارىمەن بىرگە وسىنداي جاعدايلارعا مونيتورينگتى كۇشەيتىپ، الاياقتىق فاكتىسى بويىنشا ازاماتتاردىڭ وتىنىشتەرىن جەدەل قاراۋى كەرەك"، — دەدى ءاليحان سمايىلوۆ.
قورىتىندىلاي كەلە، پرەمەر-مينيستر حالىقتىڭ شامادان تىس نەسيە الۋ ماسەلەسىنىڭ ۇتىمدى شەشىمى جاڭا وندىرىستەر مەن تۇراقتى جۇمىس ورىندارىن قۇرۋ ەكەنىن ايتتى.
"بۇل حالىقتىڭ تابىسىن ارتتىرۋعا جانە كرەديت الۋىن تومەندەتۋگە بارىنشا وڭ اسەر ەتەدى. وسىعان بايلانىستى جاۋاپتى مەملەكەتتىك ورگاندار مەن اكىمدىكتەر جوسپارلانعان ينۆەستيسيالىق جوبالاردى، اسىرەسە شيكىزاتتىق ەمەس سەكتورلاردا ىسكە اسىرۋدى جەدەلدەتىپ، جاڭا جوبالاردى پىسىقتاۋى ءتيىس"، - دەپ تۇيىندەدى ۇكىمەت باسشىسى.