ەلىمىزدىڭ سەگىز وڭىرىندە جەرگىلىكتى اۋقىمداعى توتەنشە جاعداي رەجيمى ساقتالۋدا. اقتوبە وبلىسىنداعى ەكى ەلدى مەكەن ءالى دە كولىك قاتىناسىنسىز وتىر. تۇرعىندار ازىق-تۇلىكپەن جانە دارى-دارمەكتەرمەن قامتاماسىز ەتىلگەن.
3 وڭىردە كۇيدىرگى كومىلگەن 10 ورىندى سۋ باسقان. ءتيىستى قىزمەتتەر جەرگىلىكتى جەردە جەدەل دەزينفەكسيالاۋ شارالارىن جۇرگىزىپ جاتىر.
«قازىرگى ۋاقىتتا ەلىمىزدەگى سۋ تاسقىنى جاعدايى جالپى تۇراقتانىپ كەلەدى. وسى اپتادا اتىراۋ وبلىسىندا سۋ تاسقىنىنىڭ شارىقتاۋ شەگى بولادى دەپ بولجانعان. ءقازىر جايىق وزەنىندەگى سۋ دەڭگەيى يندەربور جانە ماحامبەت سۋ بەكەتتەرىندە ءقاۋىپتى بەلگىلەردەن اسىپ ءتۇستى. سۋ تاسقىنىنا قارسى ءىس-شارالاردى جۇرگىزۋ ءۇشىن 7 مىڭنان استام ادام جانە 1900 بىرلىك تەحنيكا، ونىڭ ىشىندە 6 اۋە كەمەسى جۇمىلدىرىلدى. وعان تجم، پوليسيا، ۇلتتىق ۇلان، قورعانىس مينيسترلىگى جانە جەرگىلىكتى اتقارۋشى ورگانداردىڭ كۇشتەرى مەن قۇرالدارى تارتىلىپ، جەكە ۇيىمدار مەن ەرىكتىلەر قاتىسۋدا»، — دەدى قانات بوزىمبايەۆ.
سۋ باسۋ ايماقتارىنان 119 مىڭنان استام ادام ءقاۋىپسىز جەرگە كوشىرىلدى، ونىڭ 44 مىڭى – بالالار. بۇگىنگى تاڭدا 55،6 مىڭ ادام ءوز ۇيلەرىنە ورالدى. ەۆاكۋاسيا بەكەتتەرىندە شامامەن 5 مىڭ ادام قالدى، 58 مىڭنان استام تۇرعىن تۋىستارىنىڭ ۇيىنە ورنالاسقان.
سۋ تاسقىنىنىڭ سالدارىنان ەلىمىزدە 12 908 تۇرعىن ءۇي سۋ استىندا قالعان، ونىڭ ىشىندە ءۇش وڭىردە – اقتوبە، اتىراۋ جانە سولتۇستىك قازاقستان وبلىستارىندا 264 ءۇي ءالى دە سۋ استىندا قالىپ وتىر.
سونداي-اق 25 921 ساياجاي ۋچاسكەسى سۋ استىندا قالدى، وندا 18 025 ساياجاي ءۇيى ورنالاسقان.
وتىرىس بارىسىندا ۆيسە-پرەمەر سۋ تاسقىنىنىڭ سالدارىن جويۋعا قاتىسىپ جاتقان ءىرى كومپانيالار مەن بيزنەسمەندەر جايىندا ايتىپ ءوتتى. اتاپ ايتساق، اقمولا وبلىسىندا Integra Construction جانە RG Gold دەمەۋشىلىك كومەك كورسەتەدى. اقتوبە وبلىسىندا – «بولات وتەمۇراتوۆ قورى»، «BI Group» اق جانە ERG كومپانيالار توبى.
- باتىس قازاقستان وبلىسى بويىنشا Astana Motors كومپانيالار توبى، BI Group اق، Jusan بانك، «بانك سەنتر كرەديت» اق، «قازازوت» ج ش س جانە باسقالارى دەمەۋ كورسەتەتىن بولادى.
- قوستاناي وبلىسى بويىنشا – ADD Capital، ERG، «الليۋر» جانە «اگروماشحولدينگ»، «بازيس-ا»، سونداي-اق RG Brands كومپانيالارى.
- سولتۇستىك قازاقستان وبلىسى بويىنشا – «قازاقمىس» كورپوراسياسى، Kaspi.kz اق، KAZ Minerals توبى ءوڭىر ءۇشىن دەمەۋشىلىك كومەك كورسەتۋدە.
- اتىراۋ وبلىسىنداعى سۋ تاسقىنىنىڭ سالدارىن ت. قۇلىبايەۆ پەن ق. راقىشيەۆ كومپانيالارى ەسەبىنەن جويۋ جوسپارلانىپ وتىر.
- بۇگىنگى تاڭدا 20 600 وتباسى 100 اەك مولشەرىندە ءبىرجولعى تولەم الدى. تولەنگەن قاراجاتتىڭ جالپى سوماسى – 7،5 ملرد تەڭگە.
- 680 وتباسى كەلتىرىلگەن ماتەريالدىق شىعىن ءۇشىن 362 ملن تەڭگە سوماسىندا وتەماقى الدى.
- 568 وتباسى تۇرعىن ءۇيدى جوندەۋگە جانە قالپىنا كەلتىرۋگە 710 ملن تەڭگە سوماسىندا وتەماقى الدى.
«وڭىرلەردە زالالدى باعالاۋ جانە ونى وتەۋ جۇمىستارى جالعاسۋدا. جاعداي تۇراقتى باقىلاۋعا الىنعان»، — دەپ تۇيىندەدى ۆيسە-پرەمەر.