ورمان ءورتىنىڭ بەتىن قايتارۋ - كوپتى امان ساقتاۋمەن تەڭ.
قازاقستاننىڭ ەكى تىكۇشاعى تۇركيانىڭ وڭتۇستىك-باتىسىنداعى ورمان ورتتەرىن سوندىرۋگە اتسالىسىپ جاتىر. كاسىبي دايىندالعان ەكيپاج اۋە كەمەسىمەن 10 ساعاتتان استام ۋاقىت بويى سۋ شاشتى، دەپ حابارلايدى almaty-akshamy.kz.
ايتا كەتەيىك، مەملەكەت باسشىسىنىڭ ارنايى تاپسىرماسىمەن تۇركياعا ارنايى جاراقتالعان ەكى تىكۇشاق جانە 16 قۇتقارۋشى جىبەرىلگەن بولاتىن. توتەنشە جاعدايلار مينيسترلىگىنىڭ توبى ايماقتاعى ءورت سونگەنشە جۇمىسىن جالعاستىرادى.
ق ر تجم اۆاريالىق قۇتقارۋ قىزمەتتەردىڭ كۇشتەرى مەن قۇرالدارى باسقارماسىنىڭ باستىعى اسەت جىلقايداروۆتىڭ پىكىرىنشە، ءبىزدىڭ قۇتقارۋشىلار بار كۇش-جىگەرىن سالۋدا.
«12 تامىزدا ق ر تجم جيىنتىق قۇرامىمەن تۇركيا ەلىنىڭ دالامان پروۆينسياسىندا ءورت ءسوندىرۋ جۇمىستارى باستالدى. «كازاۆيا» اق تىكۇشاقتارىمەن 45 سيكل سۋ شاشۋ باستالدى. بۇل 180 توننا دەگەن ءسوز. ءورت ءسوندىرۋ بويىنشا جۇمىستار جالعاسۋدا»، - دەدى ول.