2025 جىلدىڭ ەكى ايىندا ىشكى ىستەر مينيسترلىگى ەلىمىزدىڭ قۇقىق قورعاۋ ورگاندارىمەن ىزدەۋدە جۇرگەن 311 كۇدىكتىنى ۇستادى، دەپ حابارلايدى aqshamnews.kz Polisia.kz-كە سىلتەمە جاساپ.
ونىڭ ىشىندە:
كىسى ولتىرگەنى ءۇشىن - 7 ادام؛
قاراقشىلىق شابۋىل جاساعانى ءۇشىن - 1 ادام؛
دەنساۋلىققا قاساقانا اۋىر زيان كەلتىرگەنى ءۇشىن - 6 ادام؛
توناۋ جاساعانى ءۇشىن - 7 ادام؛
بوپسالاۋ قىلمىسى ءۇشىن – 1 ادام؛
ۇرلىق ءۇشىن - 75 ادام؛
ەسىرتكىمەن بايلانىستى قىلمىستار ءۇشىن 10 ادام قۇرىقتالدى.
سونىمەن قاتار حابار-وشارسىز كەتكەن 145 ادامنىڭ جۇرگەن جەرى انىقتالدى.
- وتكەن جىلى استانا قالاسىندا تۇراتىن ازاماتتىڭ اۆتوكولىگىن اشىق تۇردە تارتىپ العان 40 جاستاعى ەر ادام تۇركىستان وبلىسىندا ۇستالدى. ماڭعىستاۋ وبلىسىندا 50 جاستاعى ەر ادام قۇرىقتالدى. ول بىلتىر جازدا توعىز كەلىدەن استام گاشيش ساتقان، - دەدى ءىىم كريمينالدىق پوليسيا دەپارتامەنتىنىڭ باستىعى قانات نۇرماعامبەتوۆ.
قازاقستان پوليسەيلەرى تمد جانە الىس شەت ەلدەر ءۇشىن 85 قىلمىسكەردى ۇستادى.
- مىسالى، تۇركىستان وبلىسىندا مەملەكەتتىك شەكارادان وتپەك بولعان كەزدە ەكى جىل بۇرىن ماسكەۋ تۇرعىنىن ولتىرگەنى ءۇشىن ىزدەۋدە جۇرگەن 42 جاستاعى وزبەكستان ازاماتى ۇستالدى. سونداي-اق جامبىل وبلىسىندا شەتەل ازاماتى ۇستالدى. 2014 جىلى تاجىكستان پوليسەيلەرى ودان 72 كەلىدەن استام گاشيش تاركىلەگەن، - دەدى قانات نۇرماعامبەتوۆ.
سپيكەردىڭ سوزىنشە، شەتەلدىك ارىپتەستەرمەن تۇراقتى نەگىزدە جۇمىس جۇرگىزىلۋدە، سونىڭ ناتيجەسىندە رەسپۋبليكادان تىس جەرلەردە ىزدەۋدە بولعان 21 ادام انىقتالىپ، ۇستالدى.
- پولشاداعى ۆارشاۆا اۋەجايىندا ەر ادام ۇستالدى. ول 2014 جىلى قازاقستان رەسپۋبليكاسى ازاماتتارىن الداپ، ءبىر ميلليونداي اقش دوللارىن قولدى ەتكەن. تۇركيا رەسپۋبليكاسىنىڭ انتاليا قالاسىندا 39 جاستاعى ايەل ۇستالدى. ول دا الماتىلىق تۇرعىنداردى الداپ، 146 مىڭ اقش دوللار العان. بۇل باعىتتاعى جۇمىس جالعاسۋدا، - دەدى پوليسيا پولكوۆنيگى.