«كوكتەم-2022» وقۋى شەڭبەرىندە تاكتيكالىق-ارنايى جاتتىعۋلار وتكىزۋ جوسپارلانىپ وتىر.
قازاقستاننىڭ بارلىق وڭىرىندە ورتالىق مەملەكەتتىك جانە جەرگىلىكتى اتقارۋشى ورگانداردىڭ، ازاماتتىق قورعاۋدىڭ رەسپۋبليكالىق جانە وبلىستىق قىزمەتتەرىنىڭ، قارۋلى كۇشتەردىڭ جانە باسقا دا اسكەري قۇرىلىمداردىڭ بولىمشەلەرىنىڭ رەسپۋبليكالىق كوماندالىق-شتابتىق وقۋ-جاتتىعۋى وتەدى، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
وقۋ-جاتتىعۋعا باسشىلىق باتىس قازاقستان وبلىسىنىڭ ورتالىعى – ورال قالاسىنان جۇزەگە اسىرىلادى. تجم مالىمەتىنشە، سولتۇستىك قازاقستان، شىعىس قازاقستان، اقمولا، قاراعاندى جانە قوستاناي وبلىستارىندا سۋ باسۋ ءقاۋپىنىڭ جوعارى دەڭگەيى ساقتالۋدا. وقۋ-جاتتىعۋ بارىسىندا حالىقتى حاباردار ەتۋ، باسقارۋ ورگاندارىن، كۇشتەر مەن قۇرالداردى كوكتەمگى كەزەڭگە جانە توتەنشە جاعدايلاردى جويۋ كەزىندەگى ءىس-قيمىلدارعا دايىنداۋ ماقساتىندا ورتالىق مەملەكەتتىك جانە جەرگىلىكتى اتقارۋشى ورگانداردىڭ ءوزارا ءىس-قيمىلى ماسەلەلەرى پىسىقتالاتىن بولادى.
«كوكتەم-2022» وقۋى شەڭبەرىندە تاكتيكالىق-ارنايى جاتتىعۋلار وتكىزۋ جوسپارلانىپ وتىر. وندا سۋ تاسقىنىنا قارسى ءىس-شارالار بارىسىنداعى مىندەتتەر پىسىقتالاتىن بولادى. قارۋلى كۇشتەردىڭ بۇل وقۋ-جاتتىعۋعا قاتىسۋى ەل پرەزيدەنتى قاسىم-جومارت توقايەۆتىڭ داعدارىس جاعدايلارىندا ۆەدومستۆوارالىق ۇيلەستىرۋدى كۇشەيتۋ جونىندەگى تاپسىرماسىن ىسكە اسىرۋدىڭ ماڭىزدى شاراسى بولىپ تابىلادى.