جەرگىلىكتى جولدار جەلىسىنىڭ نورماتيۆتىك جاعدايى 85 پايىزعا جەتكىزىلەدى دەپ كوزدەلىپ وتىر.
يندۋستريا جانە ينفراقۇرىلىمدىق دامۋ مينيسترلىگى ەلىمىزدەگى ەڭ ناشار جانە ەڭ جاقسى جولدارى بار وڭىرلەردى اتادى، دەپ حابارلايدى Almaty-akshamy.kz.
«الدىن الا جاسالعان قورىتىندىعا سۇيەنسەك، جەرگىلىكتى جولداردىڭ جاعدايى ماڭعىستاۋ (95 پايىز)، جامبىل (95 پايىز) جانە الماتى (91 پايىز) وبلىستارىندا جاقسى. ال ساپاسى كوڭىل كونشىتپەيتىندەي جولدار باتىس قازاقستان (39 پايىز)، اقتوبە (66 پايىز) جانە اتىراۋ (70 پايىز) وبلىستارىنا تيەسىلى»، - دەلىنگەن حابارلامادا.
بيىل ەلىمىزدەگى 4،6 مىڭ شاقىرىمداي جەرگىلىكتى اۆتوجول جوندەۋدىڭ بارلىق تۇرىمەن قامتىلىپ، ونىڭ 2،6 مىڭ شاقىرىمىندا ءتيىستى جۇمىستار اياقتالدى. وسى ماقساتقا 372 ميلليارد تەڭگە بولىنگەن.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، قازاقستاندا وڭىرلەر ىشىندەگى جول ينفراقۇرىلىمىن دامىتۋ ءۇشىن 486 جوبا ىسكە اسىرىلىپ جاتىر. ونىڭ ىشىندە 391 جوبا بويىنشا كۇردەلى جانە ورتاشا جوندەۋ جۇمىستارى قولعا الىنسا، جاڭعىرتۋ مەن تۇتاستاي قۇرىلىسقا بايلانىستى 95 جوبا جۇزەگە اسىرىلىپ كەلەدى. وسى جىلدىڭ اياعىنا دەيىن اۆتوموبيل جولدارىن جوندەۋگە بايلانىستى 164 جوبانى، سونداي-اق جولدى سالىپ، جاڭعىرتۋ بويىنشا 6 جوبانى سوڭىنا دەيىن جەتكىزۋ مەجەلەنىپ وتىر.
«سولتۇستىك قازاقستان وبلىسىنداعى لاۆروۆكا – چكالوۆو اۆتوموبيل جولىنىڭ 160-168 شاقىرىمداي ارالىعىن جاڭعىرتۋ مەن قىزىلوردا وبلىسىنداعى ايتەكە بي - باسىقارا اۋداندىق ماڭىزداعى كولىك جولىنداعى كوپىردى جوندەۋگە بايلانىستى جۇمىستار اياقتالۋعا جاقىن. سونداي-اق شىمكەنتتەگى شىعىس اينالما جولىندا جۇرگىزىلىپ جاتقان قۇرىلىستىڭ 1 كەزەڭى ءتامامدالىپ قالدى»، - دەدى ييدم وكىلى.
بۇدان بولەك، بيىل الماتىداعى اباي داڭعىلىنىڭ جالعاسىن اباتتاندىرۋ بويىنشا دا جۇمىستار سوڭىنا دەيىن جەتكىزىلمەك. بۇل رەتتە اتالعان داڭعىل مەملەكەت باسشىسىنىڭ تاپسىرماسىنا سايكەس ىسكە اسىرىلىپ جاتقان ۇلكەن الماتى اينالما اۆتوموبيل جولىنىڭ 6 راديالدى تارماعىنىڭ ءبىرى سانالاتىنىن ايتا كەتكەن ورىندى. جۇرگىزىلگەن جۇمىستاردىڭ قورىتىندىسى بويىنشا ەلىمىزدەگى جەرگىلىكتى جولدار جەلىسىنىڭ نورماتيۆتىك جاعدايى جىل سوڭىنا دەيىن 85 پايىزعا جەتكىزىلەدى دەپ كوزدەلىپ وتىر.