ەلىمىزدىڭ وڭتۇستىگىندە تاعى ءبىر قانت زاۋىتىن سالۋ جوسپارلانۋدا

الداعى 3-4 جىلدا ءوزىن-وزى قامتاماسىز ەتۋ كورسەتكىشىن 80 پايىزعا جەتكىزۋ كوزدەلىپ وتىر

ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ەلىمىزدىڭ وڭتۇستىگىندە تاعى ءبىر قانت زاۋىتىن سالۋ جوسپارلانىپ وتىرعانىن ايتتى، دەپ حابارلايدى Almaty-akshamy.kz 

اۋىل شارۋاشىلىعى مينيسترلىگىنىڭ باسشىسى قازاقستان قانت ەكسپورتتامايتىنىن، ويتكەنى وندىرىلگەن بارلىق ءونىم ىشكى تۇتىنۋعا كەتەتىنىن، ءتىپتى 58 پايىزى سىرتتان يمپورتتالاتىنىن ايتتى.

«وتكەن جىلدىڭ قورىتىندىسى بويىنشا ىشكى قانت تۇتىنۋ 42 پايىزعا وتاندىق ءوندىرىس ەسەبىنەن قامتاماسىز ەتىلدى. رەسپۋبليكالىق ەسەپپەن العاندا، اۋماقتى، شيكىزاتتى، وندىرىستىك قۋاتتى ۇلعايتۋ ارقىلى ءبىز الداعى 3-4 جىلدا بۇل ءوزىن-وزى قامتاماسىز ەتۋ كورسەتكىشىن 80 پايىزعا جەتكىزۋدى جوسپارلاپ وتىرمىز»،  - دەدى  ق ر اۋىل شارۋاشىلىعى ءمينيسترى ەربول قاراشوكەيەۆ.

ونىڭ ايتۋىنشا، قازاقستاندا قانت جانە قانت قىزىلشاسىن وندىرەتىن ءتورت زاۋىت بار. ولار جامبىل جانە الماتى وبلىستارىندا ورنالاسقان.

«اگروونەركاسىپ كەشەنىنىڭ ۇلتتىق جوباسىنا سايكەس قانت قىزىلشاسىن ەگۋ الاڭدارىن كەڭەيتۋ شارالارى قاراستىرىلعان. ءبىز قازاقستاننىڭ وڭتۇستىگىندە زاۋىتتاردى جاڭارتىپ، تاعى ءبىر زاۋىت سالۋدى جوسپارلاپ وتىرمىز»، - دەيدى ەربول قاراشوكەيەۆ.