پوليسەيلەر قارۋ ۇرلاۋعا قاتىسى بار 8 ادامدى قولعا ءتۇسىردى.
الماتىدا قاڭتار وقيعاسى كەزىندە ۇرلانعان قارۋدىڭ كەزەكتى پارتياسى تاركىلەندى، دەپ حابارلايدى Almaty-akshamy.kz ق ر ءىىم
ق ر ءىىم كولىكتەگى پوليسيا دەپارتامەنتىنىڭ باستىعى وڭال بەكەيەۆتىڭ ايتۋىنشا، جەدەل ىزدەستىرۋ ءىس-شارالارى بارىسىندا كولىك پوليسەيلەرى الماتى قالاسىنىڭ 21 جاستاعى تۇرعىنىن انىقتاپ، ۇستادى. اتالعان ازامات قاڭتار وقيعاسىنان كەيىن ءوزىنىڭ تانىسىمەن بىرگە تۇركسىب اۋدانىندا ورنالاسقان قاراۋسىز قالعان عيماراتتىڭ جەرتولەسىنە ەكى اتىس قارۋىن جاسىرعان.
«تەكسەرۋ بارىسىندا كۇدىكتىنىڭ بۇرىن ادام توناعانى ءۇشىن قىلمىستىق جاۋاپكەرشىلىككە تارتىلعانى انىقتالدى. اتىس قارۋى تاركىلەندى. سوتقا دەيىنگى تەرگەۋ اياسىندا باسقا دا قاتىسى بار ادامداردىڭ ورنالاسقان جەرىن انىقتاۋ ماقساتىندا بارلىق قاجەتتى ءىس-شارالار جۇرگىزىلۋدە»، دەدى و.بەكەيەۆ.
دەپارتامەنتتىڭ باسپا ءسوز قىزمەتىنەن تۇسكەن مالىمەتكە قاراعاندا، كولىك پوليسەيلەرى قاڭتار وقيعاسى كەزىندە قارۋ ۇرلاۋعا قاتىسى بار 8 ادامدى قولعا ءتۇسىردى. ولاردان بارلىعى 60 قارۋ تاركىلەندى.