بۇكىلالەمدىك «كود ساعاتى» اكسياسى قازاقستاندا 2015 جىلدان بەرى ۇيىمداستىرىلىپ كەلەدى.
جارتى ميلليوننان اسا وقۋشى «كود ساعاتى» دۇنيەجۇزىلىك اكسياسىنا قاتىسادى، دەپ حابارلايدى Almaty-akshamy.kz وقۋ-اعارتۋ مينيسترلىگىنىڭ مالىمەتىنە سىلتەمە جاساپ.
بۇل شارا ەلىمىزدىڭ بارلىق مەكتەپتەرىندە ينفورماتيكا ساباقتارى اياسىندا وتەدى.
بيىل 4-11 جەلتوقسان ارالىعىندا قازاقستاندىق وقۋشىلار «كود ساعاتى» بۇكىلالەمدىك اكسياسىنا ءۇن قوسادى.
وقۋ-اعارتۋ مينيسترلىگىنىڭ مالىمەتىنشە، شارا يننوۆاسيالىق تەحنولوگيالار تۋرالى ءبىلىمدى ەرەكشە فورماتتا تاراتۋعا باعىتتالعان. اپتالىق وقىتۋ اكسياسىن ۆەدومستۆو قولداۋىمەن USTEM Foundation قوعامدىق قورى ۇيىمداستىرىپ جاتىر.
بۇكىلالەمدىك «كود ساعاتى» اكسياسى قازاقستاندا 2015 جىلدان بەرى ۇيىمداستىرىلىپ كەلەدى. وتكەن جىلى وعان ەلىمىزدىڭ ءاربىر ونىنشى وقۋشىسى قاتىستى. بيىل ءبىز جارتى ميلليوننان استام وقۋشى قاتىسادى دەپ كۇتۋدەمىز. باستى ماقسات – وقۋشىلاردا كومپيۋتەرگە نەمەسە ينتەرنەتكە قولجەتىمدىلىكتىڭ بولماۋىنا قاراماستان، IT سالاسىنا بارلىق تىلەك بىلدىرۋشىلەردى تارتۋ. باعدارلامالاردا بالالار ءۇشىن بارلىق مۇمكىندىكتەر قاراستىرىلعان. ءقازىردىڭ وزىندە ءبىز ينفورماتيكا ءپانىنىڭ مۇعالىمدەرىن ساباق بەرۋدە يننوۆاسيالىق تاسىلدەردى قولدانۋعا ىنتالاندىرۋدامىز. ول ءۇشىن ءبىز «دارىن» وڭىرلىك ورتالىقتارىمەن بىرلەسىپ، بۇكىل ەل اۋماعىندا سەمينارلار مەن دارىستەر وتكىزۋدەمىز. مۇعالىمدەرگە تولىق ساباق جوسپارى ۇسىنىلادى. بيىلعى تاقىرىپ جاساندى ينتەللەكتكە ارنالعان، – دەدى قوردىڭ نەگىزىن قالاۋشىلاردىڭ ءبىرى اسىلبەك مۇرزاحمەتوۆ.
بۇل شارا ەلىمىزدىڭ بارلىق مەكتەپتەرىندە ينفورماتيكا ساباقتارى اياسىندا وتەدى. وعان 6 جاستان 18 جاسقا دەيىنگى مەكتەپ وقۋشىلارى قاتىسادى. ەڭ بەلسەندى وقىتۋشىلار مەن قاتىسۋشىلارعا وقۋ-اعارتۋ مينيسترلىگىنەن سەرتيفيكاتتار تابىستالىپ، FIRST جارىستارىنا قاتىسۋعا مۇمكىندىك بەرىلەدى.