التىن قۇيمالار سىيلاۋ سانگە اينالىپ بارادى. ساراپشىلاردىڭ ايتۋىنشا، قازاقستاندىقتار ارسىندا وسىنداي قۇندى تارتۋلار جاساۋ ءجيى كورىنىس تابا باستاعان، دەپ حابارلايدى Almaty-akshamy.kz
ەستەرىڭىزگە سالا كەتەيىك، ۇلتتىق بانك 2017 جىلى ەكىنشى دەڭگەيلى بانكتەر مەن ايىرباستاۋ پۋنكتەرى ارقىلى حالىققا باعالى مەتالل ساتۋ باعدارلاماسىن ىسكە قوستى. سودان بەرى قازاقستاندىقتار ءتۇرلى نومينالداعى 75 مىڭعا جۋىق داناسىن ساتىپ العان.
ەڭ جەڭىلىنىڭ سالماعى 5، ال ەڭ اۋىرى 100 گرامدى قۇراعان. نەگىزىنەن مۇنداي قۇيمالار الماتى، نۇر-سۇلتان جانە اتىراۋدا ۇلكەن سۇرانىسقا يە. قارجىگەرلەر ولاردىڭ وتىمدىلىگىن قامتاماسىز ەتۋدىڭ باستى فاكتورى رەتىندە بانكتەر مەن ايىرباستاۋ پۋنكتەرىنىڭ التىندى كەرى ساتىپ الۋ مۇمكىندىگىنىڭ بارىندا ەكەنىن ايتادى. كليەنتكە قۇيمانىڭ قۇنى سول كۇنى بىردەن وتەلەدى.