قازاقستاندا «ۇزدىك تۋريستىك اۋىل-2025» ۇلتتىق بايقاۋىنىڭ قورىتىندىسى جاريالاندى. بۇل بايقاۋ اۋىلدىق اۋماقتاردىڭ بىرەگەي تابيعي لاندشافتتارى مەن داستۇرلەرىن، قولونەرىن ساقتاپ قالۋعا جانە ولاردى ىلگەرىلەتۋگە باعىتتالعان، دەپ حابارلايدى aqshamnews.kz
بايقاۋعا قاتىسۋ ءۇشىن وبلىس اكىمدىكتەرى ءار ايماقتان ءۇش اۋىلدى ۇسىنۋعا مۇمكىندىك الدى. ىرىكتەۋ كەزىندە تابيعي جانە مادەني رەسۋرستارعا، سونداي-اق اۋىلدارداعى ءداستۇرلى قىزمەت تۇرلەرىنىڭ ساقتالۋىنا ەرەكشە نازار اۋدارىلدى.
بايقاۋ قورىتىندىسى بويىنشا قازاقستاننىڭ ەڭ ۇزدىك 5 تۋريستىك اۋىلى انىقتالدى:
- لەپسى (جەتىسۋ وبلىسى، الاكول اۋدانى)
- ناعي ءىلياسوۆ (قىزىلوردا وبلىسى، سىرداريا اۋدانى)
- حان ورداسى (باتىس قازاقستان وبلىسى، بوكەي ورداسى اۋدانى)
- پوپەرەچنوە (شىعىس قازاقستان وبلىسى، ريددەر اۋدانى)
- شابانباي بي (قاراعاندى وبلىسى، اقتوعاي اۋدانى)
بۇل اۋىلدار وزدەرىنىڭ تابيعي سۇلۋلىعى مەن مادەني مۇراسىن ساقتاي وتىرىپ، تۋريستەردى قىزىقتىراتىن ەرەكشە ورىندارعا اينالۋدا. ايتا كەتسەك، 2023 جىلى الماتى وبلىسىنداعى ساتى اۋىلى حالىقارالىق دەڭگەيدە ەڭ ۇزدىك تۋريستىك اۋىل رەتىندە تانىلىپ، بەدەلدى UNWTO سىيلىعىمەن ماراپاتتالعان بولاتىن.