ەلىمىزدەگى توپ-5 كۋرورتتىق ءوڭىر بەلگىلى بولدى
ەلىمىزدىڭ ەڭ تارتىمدى كۋرورتتىق وڭىرلەر رەيتينگىندە الماتى تاۋ كلاستەرى كوش باستاپ تۇر. وڭىرگە 1 996 801 تۋريست ساپارلاعان، دەپ حابارلايدى aqshamnews.kz.
ماڭعىستاۋدىڭ كورىكتى پەيزاجدارى مەن كاسپيي تەڭىزىنىڭ جاعالاۋىندا 325 013 تۋريست دەمالعان.
رەيتينگتە ءۇشىنشى ورىننان كورىنگەن ششۋچە-بۋراباي كۋرورتتىق ءوڭىرى. ورمانى، كولدەرى جانە كۋرورتتىق كەشەندەرىمەن ايگىلى بۇل ءوڭىر 275 295 ساياحاتشىنى قابىلداعان.
الاكول كولىنىڭ اباي وبلىسىنداعى اۋماعىنا 125 621، جەتىسۋ وبلىسىنداعى بولىگىنە 113 059 تۋريست بارعان. وسىلايشا، بۇل ءوڭىر رەيتينگتە ءتورتىنشى ورىندى يەلەندى.
ال توپ-5 كۋرورتتىق ءوڭىر ءتىزىمىن بالقاش كۋرورتتىق ءوڭىرى تۇيىندەدى. بۇل ايماق بىلتىر 9 ايدا 120 948 تۋريست قابىلداعان.
2024 جىلدىڭ قاڭتار-قىركۇيەك ارالىعىندا قازاقستاننىڭ كۋرورتتىق وڭىرلەرىنە 3،4 ميلليون تۋريست كەلدى. قوناق ۇيلەر مەن ورنالاستىرۋ ورىندارى كورسەتكەن قىزمەت كولەمى 129 ميلليارد تەڭگەگە جەتتى.