مەملەكەت باسشىسى ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىنە قاتىسۋشىلاردى قۇتتىقتادى
مەملەكەت باسشىسى قاسىم-جومارت توقايەۆ ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىنە قاتىسۋشىلارعا قۇتتىقتاۋ جولدادى.
پرەزيدەنت قۇتتىقتاۋىن پرەمەر-مينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا وقىپ بەردى، دەپ حابارلايدى Almaty-akshamy.kz.
«سىزدەردى ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىنىڭ باستالۋىمەن شىن جۇرەكتەن قۇتتىقتايمىن. جاڭا وقۋ جىلى قارساڭىندا پەداگوگ مامانداردىڭ باسىن قوسىپ، وسكەلەڭ ۇرپاققا ءبىلىم، تاربيە بەرۋ ماسەلەسىنە قاتىستى القالى جيىن وتكىزۋ يگى داستۇرگە اينالدى. بۇل - ەلىمىزدىڭ بولاشاعىنا ىقپال ەتەتىن ماڭىزدى باسقوسۋ. ساپالى ءبىلىم بەرۋ باسەكەگە قابىلەتتى، وركەنيەتتى ەل بولۋدىڭ كەپىلى. ادامزات تاريحىنداعى جەتىستىكتىڭ بارلىعى ءىلىم، عىلىمنىڭ جەمىسى ەكەندىگى ءسوزسىز. ساۋاتتى ۇرپاق ءوسىرۋ ارقىلى عانا ۇلتتىڭ جاڭا ساپاسىن قالىپتاستىرا الامىز. ۇلت ۇستازى احمەت بايتۇرسىن ۇلى «مەكتەپتىڭ جانى ءمۇعالىم، ءمۇعالىم قانداي بولسا، مەكتەبى ءھام سونداي بولماقشى»، دەگەن. ەلىمىزدىڭ ەرتەڭى جاس ۇرپاقتىڭ ءبىلىمدى، ەڭبەكقور ءارى وتانشىل بولۋىنا بايلانىستى»، - دەدى مەملەكەت باسشىسى قۇتتىقتاۋىندا.
پرەزيدەنت جاستاردى ادال ازامات ەتىپ تاربيەلەۋ، ولاردىڭ بويىنا ىزگى قۇندىلىقتاردى ءسىڭىرۋ اسا ماڭىزدى مىندەت ەكەندىگىنە نازار اۋدارتتى.
«وسى جاۋاپتى جۇمىستى ابىرويمەن اتقارىپ جۇرگەن ۇستازدار قاۋىمىنا شىنايى ريزاشىلىعىمدى بىلدىرەمىن. مەملەكەت ءبىلىم سالاسىن وركەندەتۋگە ءاردايىم باسا ءمان بەرەدى. ەلىمىزدە جاستاردىڭ جان-جاقتى دامۋىنا بارلىق جاعداي جاسالعان. زامان تالابىنا ساي وقۋ ورىندارى كوپتەپ سالىنۋدا. ارنايى زاڭ قابىلدانىپ، پەداگوگتاردىڭ مارتەبەسى قۇقىقتىق جاعىنان رەتتەلدى. ولاردىڭ الەۋمەتتىك جاعدايىن جاقسارتۋعا باس نازار اۋدارىلىپ جاتىر. وسىنداي قولداۋ ءىس-شارالارى بولاشاقتا دا جالعاسا بەرەدى. بۇگىنگى باسقوسۋدا جاس ۇرپاققا وزىق ءبىلىم، ونەگەلى تاربيە بەرۋ ماسەلەسىنە قاتىستى سالماقتى ويلار مەن ساليقالى پىكىرلەر ايتىلادى دەپ سەنەمىن. بارشاڭىزعا زور دەنساۋلىق، تولاعاي تابىس تىلەيمىن»، - دەدى قاسىم-جومارت توقايەۆ.