جاڭادان كەلگەن 2022 جىل ءوزىنىڭ ساياسي-الەۋمەتتىك سالاداعى قيىندىقتارىمەن، جۇرتشىلىقتىڭ ەرەۋىلدەرىمەن باستالدى. ەلىمىزدىڭ باتىس وڭىرلەرىندە ەكونوميكالىق تالاپتار تۇرىندە باستالعان بەيبىت شەرۋلەر، ميتينگىلەر ءارتۇرلى دەسترۋكتيۆتى ارەكەتتەرگە بوي الدىرىپ، الەۋمەتتىك تولقۋلار تۇتاستاي العانداعى قازاقستاننىڭ ءبىرشاما قالالارىن شارپىپ ءوتتى.
ەلىمىزدىڭ پرەزيدەنتى ق.ك.توقايەۆ وسى كەزگە دەيىن بارىنشا دەموكراتيالىق قۇندىلىقتار بەن باعدارلاردى الەۋمەتتىك كەڭىستىگىمىزدە ورنىقتىرۋدى ماقسات ەتىپ كەلگەنى بەلگىلى. ءبىراق ءارتۇرلى سالالارداعى تەرىس پيعىلدى كەيبىر كۇشتەر ەلدەگى بەيبىت شەرۋلەردى داعدارىستى جاعدايلارعا، تراگەديالىق وقيعالارعا جەتكىزدى.
ارينە، cاياسي داعدارىستى جاعدايدىڭ سەبەپتەرى ماماندار تارپىنان تەرەڭ تالداۋدان وتكىزىلىپ، ءتيىستى باعالارىن الارى انىق. دەگەنمەن، ايتا كەتەتىن ءجايت، قوعامداعى كەز كەلگەن وقيعانىڭ تۇپكىلىكتى وبەكتيۆتى جانە سۋبەكتيۆتى سەبەپتەرى بولادى. مىنە، سولاردىڭ قاتارىنا بەلگىلى ءبىر الەۋمەتتىك توپتاردىڭ بارىنشا مارگينالدانۋىن، كەيبىر مينيسترلىكتەر تاراپىنان وزدەرىنىڭ مىدەتتەرىن جەتكىلىكتى دەڭگەيدە تازا ورىنداۋعا تىرىسپاۋىن اتاپ وتۋگە بولادى. وسىنداي قۇبىلىستاردان تۋىندايتىن الەۋمەتتىك تەڭسىزدىك بارىنشا ايشىقتالاتىن كەزەڭ كەلدى. ايتپەسە، قوعامداعى تۇراقسىز احۋالدى تۋىنداتاتىن سەبەپتەر اۋقىمى ساقتالىپ قالۋى دا عاجاپ ەمەس.
قازىرگى زاماناۋي كەزەڭدەگى دۇنيەتانىمدىق وزگەرىستەر اياسىندا جاستارىمىزدىڭ ءبىر بولىگى دەموكراتيالىق قادامداردى وركەنيەتتى سيپاتتا جاساۋعا دايىن ەمەس ەكەنىن بايقاتتى. دەموكراتياعا ۇيرەنۋ جاۋاپكەرشىلىكتى قابىلداۋمەن استاسىپ جاتۋى ءتيىس. مىنە، وسىنداي كەيبىر قيىنشىلىقتى جاعدايدى ۇتىمدى پايدالانۋعا تىرىسقان سودىرلىق سيپاتتاعى كۇشتەر جاستاردى قاڭتارداعى وقيعالار بارىسىندا ءوز ىقپالىندا ۇستاۋعا ارەكەتتەندى. جاستاردىڭ كەيبىرى ءوز ەركىمەن، كەيبىرى ەرىكسىز، زورلىقپەن تەرىس پيعىلدى قىلمىسكەر ەلەمەنتتەردىڭ قاقپانىنا ءتۇستى، دەگەنىنە ەردى. ءسويتىپ، ەلىمىزدىڭ ەكونوميكاسىنا بۇلىكشىلدەر زور نۇقسان كەلتىردى. وكىنىشكە وراي، كەيبىر زامانداستارىمىزدىڭ ارەكەتتەرىنەن وتانسۇيگىشتىك سەزىمنىڭ ەشقانداي كورىنىسى بايقالمايدى. ونىڭ ورنىنا شەتەلدىك ەكسترەميستىك توپتاردىڭ دا، جالدامالى سودىرلاردىڭ دا وسى وقيعالارعا ارالاسىپ كەتىپ، ارانداتۋ ارەكەتتەرىن بارىنشا كەڭىنەن جاساعانىن بۇقارالىق اقپارات قۇرالدارى ارقىلى بايقادىق. ايتا كەتەتىن ءجايت، ەلىمىزدىڭ قۇقىق قورعاۋ ورگاندارى وزدەرىنىڭ تىكەلەي مىندەتتەرىن بارىنشا گۋمانيستىك نەگىزدە اتقاردى جانە زاڭنىڭ شەڭبەرىندە قيمىلداعانى بەلگىلى.
دەگەنمەن، بەيبىت شەرۋلەردىڭ جالعاسىن حالىقارالىق تەرروريزم وكىلدەرى ءوز پايداسىنا شەشۋدى ۇيعارادى. مۇزداي قارۋلانعان جالدامالى سودىرلار زاڭدى مەملەكەتتىڭ ىرگەتاسىن شايقالتپاق نيەتىن جۇزەگە اسىرۋعا تىرىستى. وعان ەشكىم جول بەرمەۋى ءتيىس بولاتىن. وسىعان وراي مەملەكەت باسشىسى ق.ك.توقايەۆ ۇقشۇ كۇشتەرىن قۇقىق قورعاۋ ورگاندارىنا كومەككە شاقىرعانىنىڭ ءوزى قيسىنعا كەلەتىن ارەكەت ەدى جانە ورىندى قادامنىڭ ارقاسىندا ۇلكەن ساياسي پوزيسيا انىقتالدى. ارينە، سودىرلارمەن كۇرەستى ءوز قارۋلى كۇشتەرىمىزبەن، كۇشتىك قۇرىلىمداردىڭ الەۋەتىمەن جەڭۋگە بولاتىنى انىق ەدى. ءبىراق ەلىمىز وسىنداي ساياسي تاۋەلسىزدىگىمىزگە نۇقسان كەلۋى مۇمكىن قىسىلتاياڭ ۋاقىتتا ءوزىنىڭ ساياسي قاتىناستارىن ءارى قاراي الدىمەن كىممەن جالعاستىراتىنىن الەمگە تانىتتى جانە تاۋەلسىزدىكتىڭ ىرگەسىن سوكپەۋدىڭ، حالىق بىرلىگىن ساقتاۋدىڭ ماقساتىن ايقىنداپ بەردى.
سان عاسىرلىق تاريحى بار حالقىمىز ءوزىنىڭ ەلىن ءارتۇرلى باسقىنشىلاردان قورعاعان، ءبىرتۇتاس ەل بولۋدىڭ قادامدارىن جاساۋمەن بولعان. ءتىپتى، الەۋمەتتىك تەڭسىزدىكتىڭ كورىنىستەرىنە شىدامدىلىقپەن، سابىرلىلىقپەن قاراپ، بولاشاقتا حالقىمىز دارا جولعا تۇسەتىنىنە سەنگەن. سوندىقتان حالىقتىڭ كۇشى ءارۋاقىتتا ونىڭ بىرلىگىندە جانە اقيقات جولىمەن جۇرۋگە تالپىنىسىندا ەكەنىن ۇمىتپاعانىمىز ءجون. تالاي ادال ۇلدارى مەن قىزدارى بار، الەۋەتى جوعارى ەلىمىزدىڭ كوپ ۇلت وكىلدەرى ءومىر ءسۇرىپ جاتقان كەڭىستىگى ءوزىنىڭ جارقىن كەلەشەگىنە سەنىممەن قارايدى دەگەن ويدامىز. بولاشاق قازاقستان الەۋمەتتىك ادىلەتتىلىك پەن رۋحاني قۇندىلىقتاردى ىزدەگەن قۋاتتى جانە وركەنيەتتى ەلگە اينالاتىنىنا سەنىمدىمىز.