الماتىدا ۇلتتىق وليمپيادا كومميتەتىنىڭ ماماندارى مەن قازاقستان بوكس فەدەراسياسىنىڭ باسشىلارى سوڭعى الەم چەمپيوناتىندا جۇلدە العان بوكسشىلاردى ماراپاتتادى، دەپ حابارلايدى almaty-akshamy.kz «حابار 24».-كە سىلتەمە جاساپ.
جاقىندا عانا سەربيا جەرىندە وتكەن دۇنيەجۇزىلىك دودادا قازاقستان قۇراماسى 2 التىن، 2 كۇمىس، 1 قولا مەدال يەلەنىپ، جالپى كوماندالىق ەسەپتە ەكىنشى ورىننان كورىنگەن ەدى.
تاۋەلسىزدىك العان جىلدان بەرى قازاق بوكسشىلارىنىڭ كەز كەلگەن ءدۇبىرلى دودادان قورجىنى بوس قايتقان ەمەس. جەڭىسكە ەتىمىز ۇيرەنىپ العانى سونداي، التىن الماساق اشۋلاناتىن حالگە جەتتىك. بيىل توكيو وليمپياداسىنداعى 2 قولا مەدالدى دا قومسىنعانىمىز راس. ال بەلگرادقا بارعان جىگىتتەر جىگەرلى مىنەزىمەن دارالانىپ، جانكۇيەرلەردىڭ ىستىق ىقىلاسىنا بولەندى. سول دۇنيەجۇزىلىك جارىستا اسىعى الشىسىنان تۇسكەن جىگىتتەردى بۇگىن قاۋىمداستىق باسشىلارى ماراپاتتادى.
الەم چەمپيونى بولعان ساكەن بيبوسىنوۆ پەن تەمىرتاس ءجۇسىپوۆ 70 مىڭ اقش دوللارىن السا، كۇمىس جۇلدەگەرلەر ماحمۇد سابىرحان مەن سەرىك تەمىرجانوۆقا 50 مىڭ، ال قولا جۇلدەگەر ابىلايحان جۇسىپوۆكە 30 مىڭ اقش دوللارى بەرىلدى. تەك قانا جۇلدەگەرلەر ەمەس الەم چەمپيوناتىنا قاتىسقان وزگە بوكسشىلار دا 800 مىڭ تەڭگەدەن سىياقى الدى. باپكەرلەر مەن كوماندانىڭ دارىگەرلەرىنە دە قارجىلاي سىيلىق تاعايىندالىپتى.
ابىلايحان اۋەسقوي بوكستان ءالى كەتە قويعان جوق.تاعى دا ەڭبەك ەتىپ، شىڭ باسىنا شىعۋدى كوزدەيدى. 33 جاستاعى الەم چەمپيونى تەمىرتاس ءجۇسىپوۆتىڭ دە ماقساتى وسى. «ءبىزدىڭ جىگىتتەر تاۋەلسىزدىگىمىزدىڭ 30 جىلدىعىنا ۇلكەن سىي جاسادى. ەندى كەلەسى جىلى ازيا ويىندارىندا دا وسى بيىكتەن كورىنەمىز دەگەن ويدامىن. ول ءۇشىن بوكسشىلارعا بارلىق جاعدايدى جاسايمىز»،-دەيدى فەدەراسيا پرەزيدەنتى كەڭەس راقىشيەۆ.