باس پروكۋرور عيزات نۇرداۋلەتوۆتىڭ توراعالىعىمەن باس پروكۋراتۋرانىڭ كەڭەيتىلگەن القا وتىرىسى ءوتتى دەپ حابارلايدى almaty-akshamy.kz
وندا ۆەدومستۆونىڭ 2022 جىلعا ارنالعان باسىم باعىتتارى بەلگىلەندى. وتىرىسقا باس پروكۋراتۋرانىڭ، قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ، قۇقىق قورعاۋ ورگاندارى اكادەمياسىنىڭ باسشىلىعى، باس اسكەري جانە باس كولىك پروكۋرورلارى، نۇر-سۇلتان، الماتى، شىمكەنت قالالارىنىڭ جانە وبلىستاردىڭ پروكۋرورلارى قاتىستى.
وتىرىس باسىندا عيزات نۇرداۋلەتوۆ پروكۋراتۋرا ورگاندارىنىڭ وتكەن كەزەڭدە قىلمىستىق جاعدايدى باقىلاۋعا، قىلمىستىق-قۇقىقتىق سالاداعى رەفورمالاردى ىلگەرىلەتۋگە، قاداعالاۋدى ازاماتتار مەن بيزنەس پروبلەمالارىن ءتيىمدى شەشۋگە قايتا باعدارلاۋعا ەرەكشە نازار اۋدارعانىن اتاپ ءوتتى.
بارلىق دەڭگەيدەگى پروكۋرورلارعا الاياقتىققا، قارجىلىق پيراميدالارعا، بالالارعا قارسى جىنىستىق قىلمىستارعا جانە ەسىرتكى ساۋداسىنا قارسى ءىس-قيمىل جونىندەگى مەملەكەت باسشىسىنىڭ تاپسىرمالارىن ساپالى ورىنداۋدى قامتاماسىز ەتۋ تاپسىرىلدى.
اتقارىلعان جۇمىستار مەن الداعى كەزەڭگە ارنالعان مىندەتتەر تۋرالى باس پروكۋروردىڭ ورىنباسارلارى ەسەپ بەردى. ەىدۇ ەلدەرىنىڭ وزىق تاجىريبەسى نەگىزىندە قىلمىستىق پروسەستى كەزەڭ-كەزەڭىمەن جاڭعىرتۋ بويىنشا پرەزيدەنتتىڭ تاپسىرمالارىن ىسكە اسىرۋ تۋرالى باياندالدى.
ءۇش بۋىندى مودەلدى ەنگىزۋدىڭ ءبىرىنشى كەزەڭى – نەگىزگى پروسەستىك شەشىمدەردى كەلىسۋ قىلمىستىق پروسەستىڭ سوتقا دەيىنگى ساتىسىندا قۇقىق قورعاۋشىلىق كەدەرگىنى بەلگىلەۋگە مۇمكىندىك بەرگەنى اتاپ ءوتىلدى.
جىل باسىنان بەرى تەرگەۋ ورگاندارىنىڭ 328 مىڭ قاۋلىسىنىڭ 286 مىڭى عانا زاڭدى دەپ تانىلدى، ال قالعاندارى كەلىسۋدەن باس تارتىلعان نەمەسە ولار قايتا پىسىقتاۋعا جولدانعان. ناتيجەسىندە تەرگەۋ ساپاسى ارتىپ كەلەدى، ازاماتتاردى قىلمىستىق شەڭبەرگە نەگىزسىز تارتۋدىڭ العاشقى ساتىسىندا جولى كەسىلگەن.
سونىمەن قاتار الەۋمەتتىك-ەكونوميكالىق سالادا داعدارىسقا قارسى شارالاردى ىسكە اسىرۋ، جەردى ۇتىمدى پايدالانۋ، ازاماتتاردى دارىلىك زاتتارمەن قامتاماسىز ەتۋ، قورشاعان ورتانى قورعاۋ، بالالاردىڭ قۇقىقتارىن قورعاۋ جانە باسقا دا وزەكتى باعىتتار بويىنشا ناتيجەلى تەكسەرۋلەر مەن تالداۋلار جۇرگىزىلدى.
سونىڭ ناتيجەسىندە پروكۋرورلاردىڭ قاداعالاۋ اكتىلەرى بويىنشا 4،8 ملرد تەڭگەگە 880 مىڭ گەكتار جەر قايتارىلىپ، 1027 بيزنەستى زاڭسىز تەكسەرۋدىڭ كۇشى جويىلدى. مەملەكەتتىك سانيتاريالىق دارىگەرلەردىڭ نەگىزسىز شەكتەۋلەرى بار 60 قاۋلى وزگەرتىلىپ، زاڭعا سايكەستەندىرىلدى.
القا قورىتىندىسى بويىنشا قاداعالاۋ ۆەدومستۆوسىنىڭ باسشىسى ازاماتتاردىڭ كونستيتۋسيالىق قۇقىقتارىن قورعاۋ، قىلمىستىلىققا قارسى ءىس-قيمىل، حالىقتىڭ سەنىم دەڭگەيىن ارتتىرۋ جانە قۇقىق ۇستەمدىگىن قامتاماسىز ەتۋ جونىندەگى باسىم مىندەتتەردى بەلگىلەدى.