ەلىمىزدىڭ بىرنەشە وڭىرىندە سينتەتيكالىق ەسىرتكى ارناسىنىڭ جولى كەسىلدى - ۇقك

الىنعان ەسىرتكىنىڭ «قارا نارىقتاعى» الدىن الا قۇنى 114 ملن تەڭگەدەن ارتىق سوماعا باعالانىپ وتىر

ۇلتتىق قاۋىپسىزدىك كوميتەتى ەسىرتكى ارناسىن جويۋ ءۇشىن ءبىرقاتار وپەراسيا وتكىزدى، دەپ حابارلايدى Almaty-akshamy.kz.

كوميتەتتىڭ مالىمەتىنشە، 23 اقپاندا قازاقستان رەسپۋبليكاسى ۇلتتىق قاۋىپسىزدىك كوميتەتى دەپارتامەنتىنىڭ قىزمەتكەرلەرى اقتوبە قالاسىنىڭ ەكى ق ر ازاماتىن ينتەرنەت ارقىلى پسيحوتروپتىق زاتتاردى وتكىزدى دەگەن كۇدىكپەن ۇستادى.

پروسەسسۋالدىق ءىس-شارالار بارىسىندا زاڭسىز اينالىمنان 1،7 كگ-دان ارتىق «مەفەدرون» جانە «α-PVP» پسيحوتروپتىق زاتتارى الىندى.
25 اقپاندا ەسىرتكى توبىنىڭ تاعى ەكى قاتىسۋشىسى ۇستالدى، ولاردان ءتىنتۋ كەزىندە 2،8 كگ-دان ارتىق سينتەتيكالىق ەسىرتكى الىندى.

سونىمەن قاتار، 2 ناۋرىزدا شىعىس قازاقستان وبلىسىندا الماتى قالاسىنان وسكەمەن قالاسىنا ەسىرتكى تاسىمالداۋعا كۇدىكتى ازامات ۇستالدى.
تەرگەۋ ءىس-قيمىلدارىندا زاڭسىز اينالىمنان 1،2 كگ پسيحوتروپتىق زات الىندى.

الىنعان ەسىرتكىنىڭ «قارا نارىقتاعى» الدىن الا قۇنى 114 ملن تەڭگەدەن ارتىق سوماعا باعالانىپ وتىر.
وسى فاكتىلەر جونىندە ق ر قك 297-بابى 3-بولىگى بويىنشا تەرگەۋ باستالدى.

اقتوبە جانە وسكەمەن قالالارىندا تەرگەۋ سوتى كورسەتىلگەن ادامدارعا قاتىستى قاماۋدا ۇستاۋ تۇرىندەگى بۇلتارتپاۋ شاراسىن سانكسيالادى.