ءىسساپاردى عىلىم جانە جوعارى ءبىلىم ءمينيسترى ساياسات نۇربەك باستاپ باردى.
ءىسساپاردىڭ العاشقى كۇنىندە دەلەگاسيا باسشىسى “بولاشاق” باعدارلاماسى ارقىلى ءبىلىم الىپ جاتقان ستۋدەنتتەرمەن كەزدەستى، دەپ حابارلايدى Almaty-akshamy.kz.
بۇگىندە 300-دەن استام ستيپەنديات ۇلىبريتانيانىڭ Russell group قاۋىمداستىعىنا كىرەتىن بەدەلدى جوعارعى وقۋ ورىندارىنىڭ ستۋدەنتى. ولار ينجەنەرلىك تەحنيكالىق، مەديسينا، IT جانە باسقا دا ماماندىقتار بويىنشا ماگيستراتۋرا جانە دوكتورانتۋرادا وقىپ، تاعىلىمدامادان وتۋدە. بيىلعى جاڭالىقتاردىڭ ءبىرى ستيپەندياتتارعا العان بىلىمدەرىن شىڭداۋ ءۇشىن شەتەلدىك كومپانيالاردا جۇمىس ىستەۋگە رۇقسات ەتىلەدى.
«Global fortune - ەڭ ۇزدىك كومپانيالاردىڭ ءتىزىمى قاراستىرىلعان. سول تىزىمگە كىرەتىن كومپانيالاردان ەگەر جۇمىسقا تۇرۋ بويىنشا ۇسىنىس بولسا ءبىزدىڭ ستيپەندياتتاردا، وندا ءبىز ءبىر جىلعا دەيىن جۇمىس نە بولماسا، تاعىلىمدامادان وتۋگە مۇمكىندىك بەرەمىز»، - دەيدى «حالىقارالىق باعدارلامالار ورتالىعى» اق باسقارما ءتوراعاسى ءانۋار جانعوزين.
عىلىم جانە جوعارى ءبىلىم ءمينيسترى باستاعان توپ، سونداي-اق، Times Higher Education رەيتينگتىك اگەنتتىگىنىڭ وكىلدەرىمەن كەزدەستى. قازاقستاندىق جوعارى وقۋ ورىندارىنىڭ رەكتورلارى حالىقارالىق رەيتينگتەرگە ەنۋدىڭ تىڭ ادىس-تاسىلدەردەرىمەن تانىستى. بۇدان بولەك UCL ۋنيۆەرسيتەتى فاكۋلتەتتەرىنىڭ دەكاندارىمەن ديدارلاسۋدىڭ ءساتى ءتۇستى.
«ءبىز ءبىلىم بەرۋ سالاسىنا ماماندانعان وقۋ ورنىمىز. قازاقستاندىق ءبىلىم وردالارىنا باسقارۋ، مامانداندىرۋ، زەرتتەۋدى دامىتۋ، وقىتۋشىلاردى دايىنداۋ سياقتى باعىتتار بويىنشا قولداۋ بىلدىرۋگە نيەتتىمىز»، - دەيدى UCL ۋنيۆەرسيتەتى ءبىلىم، تاجىريبە جانە قوعام دەپارتامەنتىنىڭ باسشىسى برەد بليتز.
ءىسساپار ماقساتى ۇلىبريتانياداعى ۇزدىك اكادەميالىق جانە زەرتتەۋ ۋنيۆەرسيتەتتەرىمەن ىنتىماقتاستىق جونىندەگى كەلىسىمدەرگە قول قويىپ، جاڭا مۇمكىندىكتەرگە جول اشۋ. بۇگىن قازاقستاندىق رەكتورلار ءبىرقاتار بريتانيالىق ارىپتەستەرىمەن كەزدەسىپ، پىكىر الماسۋلار جالعاسادى.