ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىندا سوڭعى ەكى جىلدا ءبىلىم ورداسىن اياقتاپ، روتا كومانديرىنە دەيىن وسكەن جاس وفيسەرلەرمەن كەزدەسۋ ءوتتى.
ءىس-شاراعا پروفەسسور-وقىتۋشىلار قۇرامى، جوعارى وقۋ ورنىنىڭ كۋرسانتتارى، قارۋلى كۇشتەردىڭ ارداگەرلەرى، اسكەري مەكتەپتەردىڭ تاربيەلەنۋشىلەرى مەن جاس وفيسەرلەردىڭ تۋعان-تۋىستارى قاتىستى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
قارۋلى كۇشتەردىڭ ساپالى جاڭا وفيسەرلەر كورپۋسىن قالىپتاستىرۋ جونىندەگى قورعانىس مينيسترلىگىنىڭ 2013 جىلدان بەرى جۇمىس ىستەپ كەلە جاتقان باعدارلاماسىن باسشىلىققا الا وتىرىپ، جوعارى وقۋ ورىندارى ءوز تۇلەكتەرىنىڭ كەلەشەگىن قاداعالايدى.
قۇرلىق اسكەرلەرى باس قولباسشىسىنىڭ ورىنباسارى پولكوۆنيك باۋىرجان ءابىروۆ 14 ۇزدىك جاس وفيسەرگە «ۇزدىك مامان» بەلگىسىن جانە باعالى سىيلىقتار تابىس ەتتى.
قارۋلى كۇشتەردىڭ ارداگەرى گەنەرال-پولكوۆنيك الىبەك قاسىموۆ تۇلەكتەردى ايتۋلى كۇنمەن قۇتتىقتادى.
– ءاربىر وفيسەر مادەنيەتى جوعارى جانە ءوز ءىسىنىڭ مايتالمانى بولىپ قانا قويماي، ونى جەكە قۇرامنان تالاپ ەتۋى ماڭىزدى. بارلىق جاعىنان سالماقتى بولۋعا تىرىسىپ، اسىرەسە قول استىنداعىلاردىڭ ارەكەتتەرىن باعالاۋعا قاتىستى ماسەلەلەردى قاراستىرعان كەزدە اسىعىس شەشىم قابىلداماۋ كەرەك. سوندا عانا سەندەرگە سەنىپ تاپسىرىلعان بولىمشەلەر جاۋىنگەرلىك دايارلىقتا جوعارى ناتيجەلەرگە قول جەتكىزىپ، اسكەري ءتارتىپتىڭ قاجەتتى دەڭگەيىن ساقتاي الادى، – دەدى ول.
جاس وفيسەرلەردىڭ كاسىبي قالىپتاسۋى جەكە ومىرىندەگى ماڭىزدى وقيعالارمەن قاتار جۇرەتىنى انىق. ءىس شارا بارىسىندا اعا لەيتەنانت دميتريي فومەنكو ءوزىنىڭ سۇيىكتىسى اريناعا وتاۋ قۇرۋعا ۇسىنىس جاسادى.
سالتاناتتى شارا قارۋلى كۇشتەر ۇلتتىق اسكەري-پاتريوتتىق ورتالىعى فيليالىنىڭ شىعارماشىلىق توبى دايىنداعان مەرەكەلىك كونسەرتپەن اياقتالدى.